Concello de Verín

Na xornada do pasado xoves 28, o escritor galego Xosé Neira Vilas presidiu a inauguración da mostra 'Querido Balbino: 1961-2011. Cincuenta anos de Memorias dun neno labrego' na Biblioteca Pública Municipal.

Tras visitar as instalacións e coñecer de primeira man todas as actividades que se están a realizar co obxecto de fomentar a lectura, o escritor foi recibido na casa consistorial por Francisco López Rodríguez, director xeral de Promoción e Difusión da Cultura, Juan Manuel Jiménez Morán, alcalde de Verín e todos os integrantes da corporación municipal.

A continuación, acudiron ás instalacións da Biblioteca de Verín onde descubriron a placa conmemorativa que certifica o nomeamento da mesma como membro da Rede de Bibliotecas UNESCO. Así mesmo, Xosé Neira Vilas efectuou unha breve presentación da importancia das bibliotecas e do libro Memorias dun neno labrego, para finalizar cun percorrido por esta exposición, organizada pola Consellería de Cultura e Turismo coa colaboración da Secretaría Xeral de Política Lingüística, a Dirección Xeral de Desenvolvemento Rural e a Deputación de Pontevedra.

A mesma rende homenaxe tanto a un escritor identificado coa terra como o libro Memorias dun neno labrego, o máis lido da historia da literatura galega e tamén o máis traducido a outros idiomas (contabilízanse unha vintena de traducións). 'Querido Balbino' articúlase a partir de dous eixos que guían ao espectador a través dun túnel de vitrinas. Dunha banda, preséntase a traxectoria vital do escritor a partir de fotografías, documentos e correspondencia que serven para marcar diferentes momentos transcendentes da súa biografía. E doutra banda, amósanse documentos e material referidos á traxectoria seguida polo propio libro e o seu protagonista. Neste sentido, a exposición lembra as edicións adaptacións teatrais e audiovisuais inspiradas en Memorias dun neno labrego, do que xa se imprimiron máis de 600.000 exemplares, e conta cunha sala onde se proxecta un documental sobre Balbino. Ademais, presenta tamén 10 obras pictóricas de autores galegos, inspiradas no protagonista de Memorias dun neno labrego. Os autores que colaboran nesta iniciativa son: Paco Lareo, Chema Pazos, Rofer, Esperanza Lema, Federico Fernández, Xoán Domato, Antón Pulido, Herminda Salgueiro, Siro López e Xaquín Marín.