|
O Concello de Verín organiza un obradoiro para aprender a facer o traxe de cigarrón, ben sexa completo ou partes desta máscara. Os/as interesados/as poden inscribirse até o día 20 de novembro na Casa do Concello, na oficina de información (planta baixa).
As actividades formativas, nas que tamén colabora Bazar Matías-Mativer, comezarán o 26 de novembro, e na semana que remata co Domingo de Corredoiro exporanse na Casa do Escudo os traxes que se confeccionaron. Para participar é imprescindible ter libres a tarde ou tardes nas que se desenvolvan as actividades. Os grupos, de 10 participantes por grupo (máximo de dous por actividade -traxe, careta-) fórmanse cos seguintes criterios: teñen preferencia as persoas empadroadas en Verín, e se hai máis demanda de postos que prazas valorarase a data na que se fixo a preinscrición (tanto no caso de persoas empadroadas como non). Coas persoas preinscritas terase unha reunión o mércores 21 de novembro, ás 17 horas, na Casa da Cultura co obxecto de crear grupos, establecer calendario e entregar os formularios de matrícula.
O cigarrón é unha das mostras máis importantes de cultura material, no relativo á vestimenta das efemérides, tanto do patrimonio local como do de Galicia. Por este motivo desde o ano 1997, o Concello de Verín organiza anualmente este obradoiro. A finalidade é dobre: divulgar patróns para a confección dos diversos elementos que compoñen esa peculiar máscara, e ofrecerlle a posibilidade de facer os compoñentes deste complexo traxe a calquera persoa sen coñecementos.
No Obradoiro do Cigarrón ensínaselles aos inscritos a facer os elementos artesanais da máscara, que son todos os do traxe agás a camisa, as polainas, as medias, as faixas, o pano do lombo, os zapatos e os chocallos, que se poden adquirir de produción industrial. Tamén se informa aos participantes sobre o tipo de calzado que harmoniza co traxe, que tipo de chocallos e cantos se deben adquirir, ou como vestir o traxe e utilizalo en público. Con isto preténdese que o cigarrón se manteña dentro duns canons de respecto polas formas clásicas da máscara, e que non se inclúan elementos aberrantes na confección e o uso.
O prezo da inscrición para participar en todas as actividades é de 85 euros, mentres que para realizar só o traxe ou a careta é de 65 euros (o obxectivo é que se fagan traxes completos, polo que se acepta que dúas persoas que sexan da mesma familia -parentesco até o 3º grao-, pagando unha única matrícula, participen complementariamente en actividades distintas, unha facendo o traxe e outra a careta). |
