Concello de Verín

A Biblioteca Municipal de Verín organiza mañá un contacontos moi especial. Trátase dunha colaboración co CRA Monterrei e os rapaces e rapazas estudantes que están a realizar prácticas neste centro educativo procedentes da selección final realizada pola Fundación Princesa de Girona (FPdG) dentro do proxecto “Generación Docente”.

Nesta iniciativa participarán dous estudantes de maxisterio, Lydia Cases e Raúl Vega,  procedentes de Valencia e Jaén, seleccionados entre máis de 200 estudantes de 17 universidades españolas pola Fundación Princesa de Girona ( FPdG) dentro do proxecto “Generación Docente”. Estes dous mozos forman parte dun grupo de 30 seleccionados que están asignados a 23 CRAs de Aragón, Estremadura e Galicia. Tamén colaborará na actividade Gianna Nicole, auxiliar de conversa americana que traballa no CRA Monterrei desde xaneiro. A presenza desta formadora no CRA é debida a que este centro educativo ten concedido o programa plurinfantil.

Proxecto “Generación Docente”

A Fundación Princesa de Girona  puxo en marcha o Proxecto "Generación Docente” cuxa finalidade é posibilitar a realización de prácticas en escolas rurais de referencia a estudantes de último curso do Grao de Educación Primaria e de Educación Infantil que teñan nacionalidade española ou permiso de residencia no noso país, e que sexan menores de 25 anos.

Unha das condicións para participar no proxecto era realizar as prácticas noutra comunidade autónoma coa finalidade de experimentar con outras realidades que lles permitisen aos estudantes saír da súa zona de confort.  Ademais, animábase futuros formadores a que elaborasen actividades de impacto na zona asignada, participación  –nesta ocasión- contando un conto en galego.