A Oficina de Consumo de Verín (OMIC), dependente do Concello de Verín, pecha o ano 2010 coa tramitación de 517 expedientes. Deste total, 224 foron presentadas ao Instituto Galego de Consumo, 38 reclamacións de subministro eléctrico trasladadas á Consellería de Innovación e Industria, 94 resolvéronse por mediación chegando a unha resolución amistosa do conflito e 161 corresponderon a consultas.

Unha vez máis o sector das telecomunicacións é o sector que máis queixas e consultas suscita entre os/as veciños/as de Verín e comarca. Recibíronse un total de 121 reclamacións (teléfono móbil, fixo e internet) A maioría relacionadas con negativas e atrasos a dar de baixa certos servizos, dificultade que ofrecen as compañías para proceder a portabilidade a outra empresa, cláusula de permanencia en contratos individuais, atrasos na entrega do terminal, activación de servizos non solicitados, penalizacións inxustificadas, modificacións nas condicións de contrato, publicidade enganosa, deficiencia nos servizos, e moi especialmente, disconformidade coa facturación. En internet, as queixas centráronse na baixa dos servizos e non aplicar as tarifas contratadas. As grandes empresas de telefonía soen facer caso omiso, polo que hai que recorrer a instancias superiores, neste caso o sistema arbitral de consumo, un medio para resolver conflitos entre o provedor dun servizo e o consumidor final “que é paralelo a xustiza ordinaria, gratuíto e rápido”. A este sistema trasladáronse as 121 reclamacións das cales 98 solucionáronse a favor do consumidor.

O máis significativo é o descenso de consultas e reclamacións sobre as compañías eléctricas que, no ano 2009, sufriu un enorme incremento debido ao cambio de normativa. Con todo, ocupan o segundo lugar do ranking, sobre todo por discrepancias na cantidade a pagar e no período de facturación.  
Os bancos é o terceiro sector con máis queixas, fundamentalmente en motivos relacionados con comisións, descubertos en contas ou pago de hipotecas. Mentres que o transporte aéreo incrementou as consultas na OMIC, alcanzando o carto lugar debido a folga de controladores.

Outros dos sectores nos que se produciron reclamacións foron: seguros (vivenda e accidentes), negativa a atender os sinistros e disconformidade coas valoracións efectuadas sobre os danos sufridos nos bens, gas, reparación de vehículos, academias, electrodomésticos, transporte terrestre, produtos informáticos e correos.

Os sectores que recibiron menos número de consultas e queixas foron: vivenda, mobles, roupa, xoias, alimentación, gasolineiras, animais, clínicas dentais, calzados e axencias de viaxes.