Concello de Verín

Desde Desenvolvemento Local do Concello de Verín infórmase das bases reguladoras das axudas para a habilitación dunha liña de financiamento específica para os produtores galegos de uva, instrumentadas mediante convenio de colaboración entre o Instituto Galego de Promoción Económica (Igape) e as entidades financeiras adheridas.

Esta orde ten por obxecto facilitar ás PEMES galegas produtoras de uva, directamente ou a través das asociacións, o financiamento da venda da súa produción ás adegas e demais industrias transformadoras mediante o desconto ou anticipo bancario de letras de cambio aceptadas, obrigas de pagamento á orde, ou calquera outro documento que poida ser anticipado pola entidade financeira, asinados polos seus clientes para o pagamento de facturas emitidas dende o 1 de setembro de 2011 ata un mes despois da data de publicación destas bases reguladoras.

A liña de desconto terá un límite global máximo de 15 millóns de euros e o seu importe distribuirase entre as entidades financeiras participantes. O criterio de repartición será o seguinte: os primeiros 10 millóns de euros repartiranse proporcionalmente ao montante de operacións financeiras de desconto realizadas ao abeiro das bases publicadas mediante Resolución do 5 de xaneiro de 2010, cun mínimo de 200.000 € por entidade financeira adherida. Os restantes 5 millóns de euros serán asignados á solicitude das entidades financeiras adheridas, unha vez esgotado o seu correspondente cupo, por orde de solicitude e en función das solicitudes que certifiquen ter recibidas.

O prazo de presentación de solicitudes finaliza o 11 de xuño de 2012 ou ata que se esgote o crédito orzamentario; e a tramitación de devanditas subvencións será levada a cabo a través das entidades financeiras adheridas a este programa.  Para máis información deben dirixirse á oficina de Desenvolvemento Local, situada no primeiro piso do Concello de Verín ou no teléfono 988-410000.