|
Este fin de semana, a Casa da Cultura será testemuña das primeiras actividades programadas polo Concello de Verín con motivo da celebración do Nadal 2011, entre as que se atopan concertos e representacións teatrais.
A primeira das actividades terá lugar mañá sábado 17 de decembro ás 12 horas, co Concerto de Nadal, organizado polo Conservatorio Elemental de Música de Verín, con repertorio clásico e de Nadal. Ás 16 horas, realizarase un Concerto de Nadal pero na Residencia de Anciáns Santa María. Nesta ocasión tamén a cargo do Conservatorio Elemental, e contando coa colaboración da Comunidad de Hermanitas de los Ancianos Desamparados. A partir das 18 horas, de novo na Casa da Cultura, será a quenda para o Festival de Navidad, organizado pola Asociación de Amigos de la Cultura y el Ocio ‘La Caja de Pandora’ coa colaboración do Concello e Verín. Este grupo de teatro amateur, formado en outubro de 2008, representará as obras 'La nueva Cenicienta y su lobo', 'La sustituta del Hada Madrina de Cenicienta' e 'Cuento de Navidad'.
O domingo 18 de decembro, ás 10 horas, terá lugar a actuación Cantos Sacros e Vilancicos do Coral de Verín na Residencia de Anciáns Santa María. O mesmo está organizado e patrocinado polo Concello de Verín en colaboración coa Comunidad de Hermanitas de los Ancianos Desamparados.
Ademais, ata o 7 de xaneiro a Casa do Escudo de Verín acolle a exposición 'Beléns do Mundo e Filatelia Natalicia', que amosa misterios e representacións do Nadal de diversas culturas do mundo, así como coleccións de selos con temática natalicia na Casa do Escudo. Está organizado pola Comunidade Mercedaria de Verín e Concello de Verín coa colaboración da Delegación de Misións de Ourense e Sociedad Filatélica, Numismática e Vitolfílica Miño de Ourense. A mostra pódese visitar de luns a sábado, de 10 a 14 e de 16.30 a 20.30 horas. Por outra banda, entre o 22 de decembro e o 5 de xaneiro, de luns a venres, de 10 a 14 e de 16 a 20 horas, desenvolverase a iniciativa de ‘Ludonadal’, organizada polo Concello de Verín e a Asociación de Empresarios de Verín (AEVER); e destinada a promocionar económicamente o comercio tradicional na localidade, facilitar a conciliación dos pais e nais e proporcionar aos/ás nenos/as un espazo de lecer durante as vacacións de Nadal. Para poder acceder a esta actividade, na que cinco monitores/as encargaranse da dinamización da mesma, será necesario entregar un vale, selado pola empresa correspondente, xunto co ticket da compra, á hora de recoller ao menor, e que xustifique a realización de compras nalgún dos establecementos integrados en AEVER -existindo un límite mínimo de 20 euros (nun só ticket o en varios que sumen este total) e unha penalización de 10 euros no caso de non portar o ticket e vale-. |
