|
A sala de xuntas do Concello de Verín acolleu unha nova reunión da Mesa da para a mellora da atención ás vítimas da violencia de xénero, na que participaron a responsable do Centro de Información ás Mulleres e representantes da Subdelegación do Goberno de Ourense, traballadores/as sociais das Mancomunidades de Municipios da Comarca de Verín, persoal do Centro de Saúde, Unidade de Antropoloxía do Instituto de Medicina Legal de Galicia , dos Corpos e Forzas de Seguridade do Estado, Educación e Xustiza.
Ao longo da sesión, realizouse un balance do ano 2011 no que se subliñou a mellora da coordinación e axilización nas actuacións entre os diferentes servizos que conforman esta Mesa, no referente a atención de vítimas de violencia de xénero tanto en mulleres como en menores. Ademais, os presentes analizaron o papel dos medios de comunicación na transmisión de noticias de violencia de xénero, “xa que en ocasión publícanse datos sen estar finalizados os informes e se provoca un xuízo mediático que entorpece a investigación”, indicou Carmen Serrano Fernández, responsable do Centro de Información ás Mulleres. Tamén recoñeceu “que coa crise económica se incrementa o maltrato económico e psicolóxico, debido a dependencia económica dalgunhas mulleres, que non chegan a denunciar esta situación”.
A mesa para a mellora da atención ás vítimas da violencia de xénero busca mellorar a atención e conseguir a súa adaptación ás necesidades reais das mulleres vítimas de violencia, desenvolver unha actuación integral e multidisciplinar eficaz de modo conxunto e coordinado, garantir os dereitos e liberdades da cidadanía, eliminar a vitimización secundaria; garantir que desde os servizos sociais, sanitarios, policiais e operadores xurídicos se transmita información responsable e unificada ás mulleres afectadas por unha situación de maltrato, optimizar e axilizar todos os recursos existentes para evitar duplicidades, promover e apoiar proxectos de prevención da violencia de xénero e de detección precoz de situacións de violencia na familia, sensibilizar e potenciar a formación continua dos profesionais que reciben demandas de atención a vítimas de violencia e incrementar o nivel de confianza das vítimas no sistema. |
