Concello de Verín

Durante a xornada de mañá, a localidade de Verín acollerá a realización de dúas actividades aptas para todos os públicos: Animación Infantil Aever e Panxoliñas Tradicionais.

A primeira das actividades, Animación Infantil Aever, terá lugar a partir das 17.30 horas no Pavillón Municipal de Deportes de Verín. Está organizada polo Centro Comercial Urbano de Verín, coa colaboración da Eurocidade Chaves-Verín, e contará coa actuación de monicreques, malabaristas ou ximnastas. Durante esta gala tamén se repartirán os seis premios de 100 euros da campaña ‘Este Nadal merca en Verín’ e os do concurso Escaparates da Antena Local de Verín da Cámara de Comercio de Ourense.

A segunda, Panxoliñas Tradicionais, será no salón de actos da Casa da Cultura de Verín desde as 20.30 horas. Cantos e músicas tradicionais de Nadal interpretados por grupos de asociacións de mulleres rurais da Comarca de Verín, Agrupación Musical de Bouses e Grupo Brixel. Esta actividade está organizada pola Asociación Cultural A sombra do Brixel.

Ademais, ata o 7 de xaneiro a Casa do Escudo de Verín acolle a exposición 'Beléns do Mundo e Filatelia Natalicia', que amosa misterios e representacións do Nadal de diversas culturas do mundo, así como coleccións de selos con temática natalicia na Casa do Escudo. Está organizado pola Comunidade Mercedaria de Verín e Concello de Verín coa colaboración da Delegación de Misións de Ourense e Sociedad Filatélica, Numismática e Vitolfílica Miño de Ourense. A mostra pódese visitar de luns a sábado, de 10 a 14 e de 16.30 a 20.30 horas.