Concello de Verín

Mañá, desde ás 17 horas, o Pavillón Municipal de Deportes de Verín acollerá a visita do Carteiro Real aos/ás nenos/as do municipio.

Durante toda a tarde, realizaranse obradoiros de globoflexia, manualidades con papel e maquillaxe infantil, por parte das monitoras de Ludonadal, para todos os/as menores asistentes a esta actividade de Nadal. Ademais, se colocarán inchables no interior do recinto. Ás 18 horas está prevista a chegada do Carteiro Real, e para finalizar chocolate con doces e churros. Previamente, serán recollidas todas as cartas depositadas polos/as nenos/as do municipio nas caixas de correos situadas en todos os establecementos do Centro Comercial Urbano de Verín durante este último mes.

Tamén no marco da programación de Nadal, o vindeiro día 5 de xaneiro finaliza a cuarta edición de 'Ludonadal', unha ludoteca destinada a estas datas e dirixida a nenos/as con idades comprendidas entre os 3 e 8 anos,  co obxecto de promocionar económicamente o comercio tradicional na localidade, facilitar a conciliación dos pais e nais e proporcionar aos/ás nenos/as un espazo de lecer durante as vacacións de Nadal.Para poder acceder a esta actividade, organizada polo Concello de Verín e a Asociación de Empresarios de Verín, será necesario entregar un vale, selado pola empresa correspondente, xunto co ticket da compra, á hora de recoller ao menor, e que xustifique a realización de compras nalgún dos establecementos integrados en AEVER -existindo un límite mínimo de 20 euros (nun só ticket o en varios que sumen este total) e unha penalización de 10 euros no caso de non portar o ticket e vale-.

Ademais, a Casa do Escudo de Verín acolle ata o 7 de xaneiro a exposición 'Beléns do Mundo e Filatelia Natalicia', que amosa misterios e representacións do Nadal de diversas culturas do mundo, así como coleccións de selos con temática natalicia na Casa do Escudo. Está organizado pola Comunidade Mercedaria de Verín e Concello de Verín coa colaboración da Delegación de Misións de Ourense e Sociedad Filatélica, Numismática e Vitolfílica Miño de Ourense. A mostra pódese visitar de luns a sábado, de 10 a 14 e de 16.30 a 20.30 horas.