|
Coincidindo coa elaboración do Plan de Autoprotección para o Entroido, por parte da área de Seguridade Cidadá do Concello de Verín, realizouse un tríptico do Entroido de Verín que inclúe, ademais dun pequeno programa e información sobre a figura do cigarrón, normas de seguridade a aplicar durante a celebración do Xoves de Comadres e nos desfiles.
Estas normas están destinadas a facilitar o traballo dos diferentes equipos de emerxencia que traballan durante estes días, ante calquera emerxencia (sexa ordinaria ou extraordinaria), mentres que veciños/as e visitantes poidan gozar do Entroido de Verín sen que se poña en risco a súa saúde e integridade física.
As mesmas para os desfiles son evitar conducir o seu vehículo polo centro de Verín e respectar as indicacións e recomendacións que dan as Forzas e Corpos de Seguridade do Estado e Protección Civil. Mentres que as normas establecidas para as actividades na Praza García Barbón (con especial atención no Xoves de Comadres) son: teña coidado cos obxectos persoais nas aglomeracións, se accede ao centro da vila en coche respecte as sinalizacións e non estaciones naqueles lugares que estean sinalizados (na travesía da Veiga, o Xoves de Comadres, estará prohibida a circulación e estacionamento de vehículos, agás aos/ás residentes que accedan ao seu garaxe) e no caso de emerxencia debe manterse a calma e tranquilizar ás persoas que o rodean; así como pedir axuda aos servizos de emerxencia máis próximos ou chamar ao 112, e no caso de evacuación da praza deben seguirse as indicacións dos equipos de emerxencia (saír da zona de forma tranquila e ordenada, sen correr nin empurrar a ninguén, e non volver cara atrás de novo).
O principal obxectivo do Plan de Autoprotección para o Entroido que comezou a elaborarse no pasado verán, é lograr unha correcta coordinación entre os equipos de emerxencia para garantir a seguridade do público as diferentes actividades realizadas con motivo do Entroido, así como dos/as traballadores/as que desempeñan a súa labor profesional nas mesmas. Aínda que a lexislación vixente en materia de Protección Civil e Autoprotección non considera necesaria a realización dun plan de seguridade deste tipo, xa que se trata dun evento ao aire libre con unha afluencia menor a 20.000 persoas, desde o Concello de Verín considerouse necesaria a súa realización e posta en práctica en torno as seguintes medidas:
- Reforzo dos equipos dos grupos de emerxencia, tanto de axuda interna (Protección Civil de Verín, Protección Civil de A Gudiña, Protección Civil de Lobios, Cruz Vermella de Monterrei, Policía Local de Verín, Guarda Civil de Verín, Agrupación Guardia Civil de Tráfico de Verín e Axencia Galega de Emerxencias) como externa (Consorcio Contra Incendios e Salvamento da Comarca de Verín e 061).
- Programación e realización dos seguintes grandes dispositivos cunha ampla cobertura de seguridade:
Desfile Infantil. Este ano como novidade haberá un dispositivo no que o tráfico do centro da vila estará controlado e regulado en todo momento para evitar que vehículos de grandes dimensións ou de mercadoría perigosa queden atrapados no transcurso do desfile. Todo co obxecto de evitar un posible risco e que os vehículos de emerxencia poidan acceder sen ningún problema e menos tempo a calquera parte do Desfile Infantil e da localidade (as restantes actuacións dos diferentes grupos de emerxencia quedan articuladas do mesmo modo que en anteriores edicións).
Desfiles de Domingo e Martes de Entroido. O operativo queda articulado do mesmo xeito que en anteriores edicións.
Xoves de Comadres. Dispositivo conformado por varios grupos de emerxencia Protección Civil de Verín, Protección Civil de A Gudiña, Protección Civil de Lobios, Cruz Vermella de Monterrei, Policía Local de Verín, Guarda Civil de Verín) que estarán coordinados a partir dun Posto de Mando Avanzado proporcionado pola Axencia Galega de Emerxencias (conta cun dispositivo de videogravación de seguridade realizado pola Dirección Provincial de Protección Civil de Ourense). Ademais estableceranse dous postos sanitarios, nos que se prestarán os primeiros auxilios necesarios no caso de ser precisos, e dúas ambulancias.
- Por outra banda, o Concello de Verín porá en coñecementos dos habitantes da vila, así como dos/as visitantes que se acerquen nesas datas á localidade, unha serie de consellos básicos para a seguridade tanto individual coma colectiva. Ademais, se establecerán carteis informativos onde se reflictan as vías de evacuación máis próximas na praza García Barbón por se é necesario a súa utilización.
Para a elaboración deste Plan de Autoprotección para o Entroido, o Concello de Verín tivo en conta as características das diferentes actividades programadas nesas datas, os lugares nos que se desenvolven, as características da festa e do público asistente.
|
