|
O vindeiro día 07 de febreiro, o presentador e actor Paco Lodeiro será o encargado de realizar o pregón dunha das xornadas máis participativas, orixinais e emblemáticas do Entroido de Verín: o Xoves de Comadres. Con grandes doses de humor, ironía e risas, este showman aportará unha visión particular aos asuntos de actualidade nunha noite na que se iniciará de modo oficial o ciclo do Entroido na localidade.
Francisco Javier Lodeiro Gómez (Paco Lodeiro), ademais de actor, presentador e showman, foi profesor da Escola de Imaxe e Son da Coruña durante os noventa. A súa relación co audiovisual nace a comezos desa década, primeiro na TVG en programas de produción propia e en series de ficción, para despois pasar a TVE e desde 2002 presentar o programa “Cifras y Letras” en varias canles da FORTA (Aragón, Castela La Mancha, Asturias, Madrid, Valencia, Extremadura e Galicia).
Ten traballado en populares programas radiofónicos como “Miradoiro” ou “Corre Carmela que chove”, nas series de ficción “Mareas Vivas”, “Terra de Miranda” e “Libro de Familia” (todas na TVG) e tamén ten experiencia en longametraxes como “Arde Amor”, “Blanca Madison” e “Los muertos van deprisa”. Ademais, produciu documentais e programas de televisión, polo xeral relacionados coa música “Pucho Boedo: un crooner na fin do mundo”, “Satélites: unha orquestra de lenda” ou “Sempre Pucho”.
Con respecto aos premios e recoñecementos, ten no seu haber diversos premios polo seu labor radiofónico, premio ao mellor guión no concurso de Apropósitos Nito (Deputación da Coruña, 1999) e ao mellor comunicador de TV por “Cifras e letras” nos Premios Mestre Mateo.
|
