Cinco novos cursos formativos na aula CeMIT de Verín |
|
|
|
Martes, 05 Febreiro 2013 12:32 |
Ao longo do mes de febreiro, a aula Multimedia do Concello de Verín ofertará cinco novos cursos formativos para os/as usuarios/as interesados en ampliar os seus coñecementos no sector da comunicación e novas tecnoloxías.
Os cursos que terán lugar son: procesador de textos, busca de información en Internet, correo electrónico (Webmail Creación -manexo dunha conta de correo electrónico-), retoque fotográfico (GIMP) e cámara de fotos dixital. Os mesmos serven de continuación aos outros cinco impartidos no pasado mes de xaneiro, que foron dous de iniciación á informática, dous de busca de información en internet e un de correo electrónico.
Os cursos de retoque fotográfico e cámara de fotos dixital forman parte da iniciativa 'Miradas de Muller', destinada a ofertar formación e solucións de autoemprego a mulleres desempregadas co obxectivo de axudalas na súa incorporación ao mundo laboral. A mesma consta de catro fases: xornada de presentación (14 de febreiro, de 16 a 20 horas, impartida mediante os sistemas de videoconferencia e videocolaboración a través das Aulas CeMIT participantes), impartición dos cursos anteriores, inscrición das usuarias na plataforma web “Miradas de Muller” (a través do cal poderán: acceder a pílulas informativas, dispoñer dun titor e difundir os seus servizos nunha bolsa de traballo) e participación nun concurso fotográfico a nivel nacional a través da plataforma.
Durante o ano 2012, a Aula CeMIT impartiu un total de 58 cursos, tanto de alfabetización dixital (alfabetización dixital básica, ocio e internet, operacións a través de internet ou ofimática, entre outros) como de mellora continua dos usuarios (capacitación especializada), sumando un total dun millar de participantes.
|