Concello de Verín

O acuarelista vigués Manuel Cobas expón por primeira vez en Verín a súa obra pictórica. A mostra estará  aberta ao público desde o luns día 25 até o día 9 de marzo na Casa do Escudo, e poderase visitar de luns a sábado das 17 ás 20.30 horas.

Manuel Cobas é un pintor de ampla temática, que realiza obras en xéneros tan diverxentes como as  mariñas, as paisaxes, os interiores, os nus ou os bodegóns. A luz, a cor e a sensualidade son os elementos fundamentais nas súas creacións, segundo a crítica especializada. Formado -entre outros- con Ángel Sevillano, realizou desde 1996 máis dun centenar de exposicións individuais. A obra de Manuel Cobas está incluída en coleccións de particulares e de institucións públicas dos Estados Unidos, Canadá, México, Uruguai, Suíza ou Francia, entre outros estados europeos ou americanos; ademais a rede Paradores de Turismo de España acolleu unha itinerancia das súas obras.