Concello de Verín

A sala de xuntas do Concello de Verín acolleu, na mañá de hoxe, a sinatura do convenio de renovación da Antena Local de Verín entre o alcalde Juan Manuel Jiménez e o presidente da Cámara de Comercio e Industria de Ourense, Celso Barbosa Rodríguez, que permitirá as dúas entidades proseguir coa colaboración que manteñen dende hai oito anos para ofertar servizos de proximidade aos empresarios de Verín e a súa zona de influencia.

“A renovación deste convenio permitirá non só renovar a estreita colaboración que manteñen o Concello de Verín e a Cámara de Comercio de Ourense, senón tamén continuar a ofertar aos verinenses a posibilidade de manter en funcionamento a Antena Local de Verín”, subliñou o rexedor, que tamén recordou que este servizo que naceu no ano 2005 co obxecto de promover o acceso igualitario de todas as pequenas e medianas empresas á rede de servizos empresariais que presta a Cámara de Comercio e “que os nosos veciños e veciñas non se tiveran que desprazar ata a Ourense a realizar todas as xestións necesarias para por en funcionamento as súas iniciativas e empresas, e que tamén permitiu aproximarlles cuestións como formación continua, apoio en I+D+I, calidade ou medio ambiente”.

O presidente da Cámara, pola súa banda, agradeceu o compromiso e a cooperación do Concello con este programa, coincidindo co rexedor á hora de subliñar que a Antena Local “nos permitiu achegarnos á realidade, ao día a día dos empresarios de Verín, abrindo unha clara brecha nos obstáculos que impoñen as distancias xeográficas”. Ademais, mostrou a súa satisfacción pola boa acollida que esta iniciativa tivo entre os empresarios e polas positivas opinións recollidas entre os usuarios da Antena Local. Pero sobre todo tamén, subliñou, por tres cuestións:
- Porque a Antena Local de Verín é líder en España polo tipo de servizos prestados, en particular polos relacionados co comercio e a formación, e é das mellor valoradas de España.
- Porque está entre as dez primeiras de España, ocupando o oitavo posto de entre un total de 115 oficinas, polo número de consultas atendidas (máis de 2.000).
- E porque ten ademais o aval do Fondo Social Europeo, que designou ao Programa Antenas como exemplo de Boas Prácticas pola adaptación dos servizos que ofrecen á realidade de cada territorio e onde se busca a involucración activa de axentes de carácter público, privado e as propias empresas.

A Antena Local de Verín forma parte do programa de servizos de proximidade para as pemes (Programa Antenas) e está cofinanciado polo Fondo Social Europeo, así como pola Cámara de Comercio de Ourense e o Concello de Verín.

Dende xaneiro de 2005, data da súa apertura, prestou asesoramento a máis de 200 emprendedores e, dende hai dous anos, axudou a tramitar a constitución de 24 empresas. Tamén axudou a buscar novos mercados no exterior a outras 22 firmas, elaborou quince estudos e informes para coñecer mellor a economía da zona e formou máis dun millar de alumnos. Ademais e entre outros moitos servizos, colaborou na constitución da Asociación de Empresarios de Verín, a Asociación da Ruta do Viño de Monterrei e a Asociación de Empresarios de Hostalaría da bisbarra.