|
Para fomentar a creatividade literaria dos estudantes dos centros de ensino da comarca, o Concello de Verín convoca o Certame de Relato Curto Antonio Fernández Pérez.
Bases
1ª. DOS/DAS CONCURSANTES. Poderán participar alumnos e alumnas, matriculados en Primaria (5º ou 6ª), 1º ciclo de ESO e 2º ciclo de ESO en calquera dos centros docentes da comarca de Verín.
2ª. DAS CARACTERÍSTICAS DO TRABALLO. O relato será orixinal, inédito, con temática e o estilo libre, escrito en galego; a extensión non superará 2 DIN A4 escritos por unha cara, con tipo Times New Roman de corpo 12, e marxes estándar e a un espazo e medio de interliñado.
3ª. DA SELECCIÓN DOS TRABALLOS, DOS DEREITOS DOS FINALISTAS E DOS PREMIOS
3.1. SISTEMA DE PRESELECCIÓN NOS CENTROS, PARTICIPANTES E PRAZOS. A fase de preselección é a criterio de cada centro participante, que poderá enviar á fase de selección final un máximo de 3 relatos en cada unha das tres categorías: Os relatos irán asinados cun lema. Nun sobre, que presentará co mesmo lema, introducirase información co nome, apelidos, curso, centro, enderezo e teléfono, de telo.
Os traballos seleccionados en cada centro enviaranse ou entregarase na Casa do Concello de Verín, antes das 14:00 h do día 8 de maio, mércores.
3.2. FASE DE SELECCIÓN FINAL
3.2.1. DA COMPOSICIÓN DO XURADO CUALIFICADOR. O Xurado Cualificador estará composto por membros con dereito a voz e voto, que proporá a Concellería de Cultura e Educación do Concello de Verín, e por un secretario, con voz e sen voto, que representará á organización.
3.2.2. DAS DECISIÓNS DO XURADO. As decisión do Xurado serán inapelábeis.
3.2.3. DOS PREMIOS
3.2.3.1. DOS DEREITOS DOS FINALISTAS. Todos os traballos finalistas, de participaren os/as autores/as no acto de entrega de premios -ao que serán convocados con tempo e forma pola organización- e se non acadan algún dos premios con dotación económica na fase de selección final, que se farán públicos nese acto, recibirán un lote de libros, pola súa participación e preselección para a final.
3.2.3.2. DOS TRABALLOS SELECCIONADOS PARA PREMIOS EN METÁLICO
En cada unha das tres categorías entregaranse os seguintes premios con dotación económica: 90 euros (1º premio), 60 euros (2º premio) e 30 euros (3º premio). De estimalo o Xurado, algún poderá quedar deserto.
A organización resérvase o dereito de publicar calquera dos traballos que participen na fase de selección final, que pasarán a ser da súa propiedade.
A organización do Certame resérvase o dereito de interpretar ou modificar estas Bases, dándolle publicidade entre os centros participantes. |
