'Viaxa no tempo e descubre o Barroco' na Biblioteca de Verín |
|
|
|
Martes, 23 Abril 2013 10:59 |
A Biblioteca Pública Municipal de Verín promove para o mes de maio a iniciativa 'Viaxa no tempo e descubre o Barroco', un curso de iniciación á arte barroca que será impartido pola investigadora Nuria Álvarez Font.
O mesmo, que terá lugar todos os xoves de maio de 18 a 19.30 horas, está destinado a persoas con inquietudes culturais pero sen ningún coñecemento previo no mundo da arte. 'Viaxa no tempo e descubre o Barroco' terá lugar na aula de informática da propia Biblioteca de Verín e durante este curso amosaranse as nocións claves para entender o Barroco, considerado como a arte da aparencia: esse est percipi (abrangue o século XVII e metade do XVIII), como as súas orixes, definición dun novo concepto, xéneros ou estilos, entre outros.
Este curso contará coa coordinación da licenciada en Historia da Arte e concelleira María Corona Meixeira Romasanta, e correrá a cargo da barcelonesa Nuria Álvarez Font, que posúe formación académica e experiencia laboral neste eido artístico. Para participar nesta actividade é necesario inscribirse na propia biblioteca ou no teléfono 988-414776, xa que o número de prazas é limitado. Todos/as os/as usuarios/as poden informarse tanto na web da Biblioteca http://av.centromultimedia.net/microsite/verin/biblioteca/galego/index.htm, como no perfil da mesma en Facebook http://www.facebook.com/pages/Biblioteca-Publica-Municipal-de-Verin/104133986331021?=wall
|