|
Como vén sendo tradición nas tres últimas décadas, a praza da Alameda acollerá o vindeiro mércores día 1 a Festa dos Maios. En horario matinal (10.30 e as 14.30 horas), a zona axardinada da Alameda servirá de escenario ás actividades de xogos populares (chave e petanca), música tradicional, exhibición de maios artísticos e venda de coplas.
Este ano está previsto que se exhiban na Alameda maios feitos con elementos naturais por o CEIP Amaro Refojo, CEIP Princesa de España, Colexio María Inmaculada, Centro Socio-Comunitario de Verín, Asociación Verinense de Amigos da Música – Coral de Verín, a Asociación Cultural Sons do Mestremiro, Asociación Cultural A Carrada e Asociación de Mujeres Gitana Chavorri. O diñeiro que se recade coa venda das coplas que se editan a cargo do Concello de Verín (imprímense 1000 exemplares que se venderán ao prezo de 1 euro), entregarase este ano á Cruz Vermella, por decisión da maioría dos grupos redactores.
Un ano máis, o posto do “pulpo”, que se instalará nos espazo limítrofe entre as prazas García Barbón e Alameda, ofrecerá pan, viño e auga gratuitamente, ao estar subvencionados estes produtos polo Concello de Verín ou ser ofrecidos sen cargo ao Concello por colaboradores como Aguas de Cabreiroá, empresa que financia tamén a cartelería da festa.
No apartado de xogos populares, está previsto que se celebren o Trofeo de Chave Ricardo Soto e o Trofeo de Petanca Festa dos Maios. A competición de petanca está organizada en colaboración co Centro de Servizos Socio-Comunitarios de Verín.
No que á animación musical se refire, cóntase coas actuación da Banda de Gaitas do Concello de Verín. Antes de actuar en concerto na praza da Alameda, a banda desfilará polas avenidas de Portugal e Luis Espada, rúa Lisa e prazas Maior e García Barbón.
Na segunda metade do século pasado, as coplas loando á primavera e facendo crítica dos acontecementos locais ou externos tiveron en Verín a Enrique Goméz Pato como protagonista. Desde mediados da década dos cincuenta, “O Pato” -coa colaboración dos seus fillos-, e xa desde a década dos setenta a Asociación Cultural Os Choupos e o Movimiento Junior, foron os continuadores desta expresión de cultura tradicional. No primeiro quinquenio dos oitenta, con José Ramón González Sola “Fanfán” como concelleiro de festexos, o Concello de Verín involúcrase activamente na organización, promove actividades paralelas, dálle á festa un aliciente gastronómico e subvenciona á creación de maios e coplas. .
Nesa liña, de festa aberta á participación activa de asociacións e centros de ensino (este ano entréganse 150 euros e 50 coplas sen cargo a cada grupo participante), e con lixeiras modificacións anuais, vense celebrando nos últimos trinta anos.
|
