A casa consistorial de Verín acolleu esta mañá a presentación do Concerto de Música Solidaria, a cargo do rexedor Juan Manuel Jiménez Morán, D. Jorge Estévez, párroco de Verín e representante de Cáritas no acto, e José Manuel Salgado, director do Conservatorio Elemental de Música de Verín.
O Concerto de Música Solidaria a prol de Cáritas Verín terá lugar o sábado 04 de maio, ás 17 horas, na Igrexa Parroquial de Verín. O mesmo organizado polo Conservatorio Elemental de Música de Verín, coa colaboración da Fundación Caja Rural de Zamora, ten como obxectivo recadar fondos en favor de Cáritas Verín, a través da adquisición dunha entrada para acceder a este concerto, cun prezo simbólico dun euro -que se pode adquirir na propia Igrexa Parroquia desde as 16 horas, e tamén foron vendidas polos/as alumnos/as do conservatorio-, e a colocación dunha urna no interior do recinto para efectuar doazóns. “Trátase dunha proposta que se lle presenta á sociedade verinense coa finalidade de que gozando dun concerto poidan, ao mesmo tempo, colaborar no financiamento dunha institución como é Cáritas, que traballa no día a día en favor dos veciños máis necesitados do noso concello”, subliñou Jiménez Morán.
Durante o concerto os/as músicos participantes interpretarán temas populares e clásicos como Mrs. Winter's Jump, El Gato Montés, Marcha Turca, River flows in your, Skip to My Lou, Barcarola, Goodbye Kate, For Chris and Michel, The Trumpet Tunet, Allegretto-Allegro Marcia, Allegro do Concerto en si menor Op. 35, Marche des Soldats de R. Brue, Unha noite na eira do trigo ou Danubio Vals. Todos eles pertencentes a autores como John Dowland, Juan del Encina, Manuel Penella, Wolfgang Amadeus Mozart, Yiruma, Jean-Marc Allerme, Jan Van Beekum, Jean Brouquières, Juan Montes, Lennon and McCarteny, entre outros. En anteriores edicións os concertos benéficos foron destinados para outras entidades como Save the Children -dentro da campaña 'Dar a nota pola solidariedade' nos anos 2010 e 2011, a favor de Costa de Marfil e Haití, respectivamente- e o ano pasado para Unicef. “Vivimos un momento ben difícil, cada día son máis as familias que necesitan a axuda dos demais para poder chegar a fin de mes e cubrir as necesidades fundamentais de auga, luz, alimentación”, recordou o párroco verinense, “a xente de Verín é xenerosa, e todo o que se consiga sempre vén moi ben, porque cada día as necesidades son maiores”.
|