|
No serán de onte, o equipo infantil de fútbol sala das Escolas Deportivas de Fútbol do Concello de Verín venceu por 10 a 2 goles a Os Meigallos F.S., o que supón a consecución do campionato da Liga Galega nesta disciplina deportiva.
O equipo verinense, tras as 22 xornadas de campionato, acadou un total de 62 puntos. De todos os partidos xogados gañou vinte e empatou dous, é dicir, non tivo ningunha derrota. Trátase do equipo da Liga Galega Infantil de Fútbol Sala que máis partidos venceu, seguido do Ázkar Lugo F.S. (con ata o momento 18 partidos gañados), C.D. Mare Nostrum F.S. ou A.D.C. Lumieira Lugo (con trece cada un, ata hoxe). Neste campionato participaron un total de 12 equipos de toda a xeografía galega.
Devandito equipo forma parte das Escolas Deportivas de Fútbol do Concello de Verín, organizadas pola área de Deportes de Verín, co obxecto impulsar escolas de fútbol de calidade entre os/as nenos/as do municipio, e que están divididas nas categorías de fútbol sala (benxamín e infantil)e nas de fútbol (prebenxamín, benxamín, alevín, infantil e cadetes).
Unha iniciativa deportiva en prol da saúde e do deporte escolar na que tamén se atopan as Escolas Deportivas Municipais (Escolas Infantís Xenéricas -pequexogos, psicomotricidade, xogo e deporte- e Escolas de Especialización Deportiva -aeróbic, danza oriental, tenis, baile latino, acrosport, atletismo e natación).
|
