Concello de Verín

Nas últimas xornadas, o alférez-xefe da Agrupación Guardia Civil Tráfico de Verín, Javier Barja Álvarez, impartiu a charla-coloquio 'Seguridade Viaria e 3ª Idade' a medio centenar de persoas no Centro Sociocomunitario de Verín, no marco das actividades organizadas polo Concello de Verín tras a súa adhesión á Carta Europea de Seguridade Viaria.

Na mesma amosáronse cuestións de seguridade viaria relacionadas coas persoas maiores de 65 anos, tanto a nivel de peón, coma de condutor de cuadriciclos, tractores ou bicicletas; así como a influencia dos medicamentos na condución, entre outros aspecto.

Esta iniciativa, impulsada desde a xefatura provincial da DGT, está dentro da campaña “Dá o paso, anda” centrada nos usuarios máis vulnerables da vía: os peóns. Na mesma invítase ao cidadán a desprazarse a pe e infórmase dos beneficios que este sinxelo medio de transporte repórtalle a el e á sociedade, por este motivo lánzase con tres obxectivos específicos: mellorar o coñecemento sobre a accidentalidade dos peóns e mobilidade, proporcionar espazos seguros de mobilidade para peóns e promover os desprazamentos a pé como modo de mobilidade eficiente e alternativa a realizar en traxectos curtos.

A adhesión do Concello de Verín á Carta Europea de Seguridade Viaria permite desenvolver accións concretas no ámbito da educación e seguridade viaria como son a realización destas charlas-coloquio dirixidas a grupos de risco -alumnos/as de centros educativos, embarazadas, 3ª Idade (xa se impartiron dúas neste grupo) e persoas con discapacidade ou mobilidade reducida-, desenvolvemento de campañas de seguridade viaria destinadas a reducir os accidentes de tráfico, eliminación de barreiras arquitectónicas, promoción de cursos de educación viaria anuais co obxectivo de indicar cal debe ser o comportamento como peón, pasaxeiro e condutor; mantemento e reposición de sinais de tráfico ou reforzo do traballo das forzas e corpos de seguridade na regulación e ordenación do tráfico. Unhas actuacións, que xa foron recoñecidas no ano 2010 pola Comisión Europea coa entrega do 'Premio de Excelencia en Seguridade Viaria', destinadas a concienciar aos menores e adultos da importancia de adquirir boas prácticas e previr os accidentes na estrada.