Concello de Verín

A Casa da Cultura de Verín acolleu, na mañá de hoxe, a clausura das Xornadas de formación e  presentación do simulacro en materia de xestión de emerxencias do Proxecto ARIEM 112, presidida polo director xeral de Emerxencias e Interior, Santiago Villanueva Álvarez, o xerente de Axega, Juan José Muñoz Iglesias, o do presidente Consorcio Contra Incendios e Salvamento da comarca de Verín, José Ramón Barreal Novo, e o tenente alcalde de Verín, Enrique Díaz García.

Estas xornadas formativas, que se desenvolveron ao longo de onte e hoxe no parque do Consorcio Contra Incendios e Salvamento da comarca de Verín, están articuladas en torno ao ARIEM 112 (Asistencia Recíproca Interrexional en materia de Emerxencias 112), un proxecto de carácter multirrexional, que ten como obxectivo o establecemento dun mecanismo de colaboración entre os servizos de xestión e mobilización de recursos ante emerxencias nas zonas implicadas, mediante a implantación de ferramentas comúns (informáticas e de comunicacións), a formación e implantación de métodos e protocolos de intervención comúns a todos os servizos.

Os socios do proxecto son Galicia (Axencia Galega de Emerxencias), Castela-León (112 Castela-León da Axencia de Protección Civil e Consumo) e Portugal (Comissão de Coordenação e Desenvolvimento Regional do Norte de Portugal). Os obxectivos do mesmo son: desenvolvemento dun programa conxunto para a dotación de recursos materiais, informáticos e de comunicacións, desenvolvemento dun programa de formación específica dirixido aos profesionais do sector das emerxencias nas zonas implicadas, establecemento de mecanismos de mobilización e intercambio de recursos mobilizables entre as rexións implicadas, fomento de actividades conxuntas para potenciar a cohesión, colaboración e intercambio de experiencia, minoración das disparidades existentes entre territorios en relación aos recursos dispoñibles por parte dos seus servizos de emerxencia e salvamento, implementación duns protocolos de actuación que permitan e faciliten a coordinación nas intervencións de emerxencias para facer fronte a situacións de risco no ámbito de acción conxunta.