O equipo infantil de fútbol sala das EDC Verín acadou o subcampionato no Campionato Nacional de Clubs, da Confederación Nacional de Fútbol Sala, que tivo lugar este fin de semana en Torrevieja (Alacante).
O equipo verinense, representante galego tras acadar o campionato da liga nesta tempada, chegou a final tras vencer por 1 a 8 goles a formación de Transportes Manuel Ramos (Castela-León), e por 0 a 8 ao E.D. Villarrubia (Castela- A Mancha). Na final deste campionato enfrontouse ao representante andaluz Soho Málaga F.S. e o resultado foi de 5 a 8 goles, o que supuxo que o equipo verinense alcanzou o subcampionato infantil Nacional de Clubs. Neste campionato participaron un total seis equipos de fútbol sala representando as súas respectivas comunidades: Transportes Manuel Ramos (Castela-León), Akrasala F.S. (Comunidade Valenciana), EFS Fair Play (Extremadura), Soho Málaga F.S. (Andalucía), E.D. Villarrubia (Castela- A Mancha) e EDC Verín (Galicia).
O equipo infantil de fútbol sala das EDC Verín é o campión de Liga Galega da tempada 2012-2013. Esta formación deportiva, tras as 22 xornadas de campionato, conseguiu un total de 62 puntos, con vinte partidos gañados e dous empatados, sendo o que máis partidos venceu, seguido doutras formacións como o Ázkar Lugo F.S., C.D. Mare Nostrum F.S. ou A.D.C. Lumieira Lugo.
Por outra banda, o equipo alevín A de fútbol das EDC acadou, tamén este fin de semana, no campo de Os Carrís (Barbadás) o título da Copa Delegación, tras vencer en semifinais ao Arenteiro (4-1) e na final ao Monforte (0-6).
Os dous equipos forman parte das Escolas Deportivas de Fútbol do Concello de Verín, organizadas pola área de Deportes de Verín, co obxecto impulsar escolas de fútbol de calidade entre os/as nenos/as do municipio, e que están divididas nas categorías de fútbol sala (benxamín e infantil)e nas de fútbol (prebenxamín, benxamín, alevín, infantil e cadetes). Unha iniciativa deportiva en prol da saúde e do deporte escolar na que tamén se atopan as Escolas Deportivas Municipais (Escolas Infantís Xenéricas -pequexogos, psicomotricidade, xogo e deporte- e Escolas de Especialización Deportiva -aeróbic, danza oriental, tenis, baile latino, acrosport, atletismo e natación).
|