O Plan de Competitividade Turística Puertas de Galicia, a través do proxecto “Plan de eficiencia comercializadora do destino”, programa o curso 'Comercialización on line no sector turístico', destinado as profesionais do turismo nas comarcas de Verín e Conso-Frieiras.
Esta actividade formativa ten por obxecto aportar aos profesionais da hostalería e turismo unha visión global do perfil das novas canles de comercialización e promoción turística xurdidos grazas á web social e poñerlles en disposición de poder elaborar e controlar unha estratexia de marketing on line coherente e acorde cos obxectivos do seu establecemento ou empresa. Por este motivo, centrarase na transmisión das principais fontes de obtención de tráfico e xeración de fidelización de clientes, principais métricas a ter en conta no cadro de mando da organización para valorar o rendemento das campañas de marketing on line, exploración de novas posibilidades de comercialización (ben directa ou indirectamente), principais factores de éxito en cada ferramenta de marketing on line e optimizar unha web dun establecemento turístico para potenciar a reserva directa sen intermediación.
Devandito curso, de 10.5 horas de duración, terá lugar os días 27 de xuño, 4 e 5 de xullo (de 17 a 20.30 horas) na Casa da Xuventude de Verín (Avda. De Portugal, 11 bis). O mesmo e de carácter gratuíto e para participar nel é necesario inscribirse no teléfono 986-447194. Estará impartido polo docente José Alcañiz, xerente da central de reservas on line Buscadestinos.com e de Esterea, empresa consultora en servizos de marketing on line e desenvolvemento web a empresas (Bachelor of Science in Ecomnomics pola Universidade de Buckingham -Reino Unido, 1997, e MBA pola Escola de Negocios Caixanova).
O Plan de Competitividade Puertas de Galicia está promovido por Turespaña, Secretaría Xeral para o Turismo da Xunta de Galicia e doce municipios (Castrelo do Val, Cualedro, Laza, Monterrei, Oímbra, Riós, Verín, Vilardevós, A Gudiña, A Mezquita, Viana do Bolo e Vilariño de Conso), integrados na Asociación de Municipios para o Plan de Competitividade Turística das comarcas de Monterrei e Conso-Frieiras, e a Asociación de Empresarios de Turismo e Hostalería Puertas de Galicia. Entre os obxectivos deste plan están a busca de especialización tanto no destino como no produto, deseñar unha oferta capaz de introducir a experiencia turística como elemento motivador da viaxe, así como a busca da mellora da competitividade das PEMES e MPEMES turísticas para lograr a sostenibilidade do territorio.
|