Concello de Verín

Nestas últimas xornadas, o Concello de Verín finalizou as obras de construción do centro social e adecuación do contorno da praza do Forno na localidade de Vilamaior.

“Este grupo de goberno decidiu dotar a todas as 17 localidades de Verín de centros sociais como espazos dinamizadores da vida social e cultural, co fin de revitalizar un contorno deteriorado, localizar a súa poboación e que tiveran uns servizos similares en canto a lugares de reunión e lecer con respecto á capitalidade, e se hai uns meses finalizamos o centro social de Salgueiro-Caldeliñas, nesta semana concluíuse o de Vilamaior”, indicou o rexedor, Juan Manuel Jiménez Morán.

O centro social de Vilamaior cunha superficie total de 120,26 metros cadrados é unha edificación de planta baixa situada na praza do Forno da localidade, conformada por almacén, sala de reunións, vestíbulo, aseos e soportal; que está integrado nun contorno de edificacións de construción tradicional e se configurou coma un elemento estratéxico nesta praza. “Realizouse en colaboración cos veciños de Vilamaior, ao lado dun antigo forno que fora rehabilitado coa primeira escola-obradoiro que tivemos neste Concello no ano 1995 e 1996”, subliñou o alcalde, “e ao mesmo tempo recuperouse esta praza, tras sacar unhas vivendas derruídas que foron adquiridas polo pobo, e un antigo pozo que estaba tapado nesta praza”.

As remodelacións efectuadas nesta praza son a pavimentación da mesma con formigón impreso de color ocre similar ás tonalidades das construcións do contorno, delimitación da zona peonil respecto á de tráfico rodado mediante unha liña de pavimento de pedra granítica, dotación de mobiliario urbano (farois, bancos e papeleiras), instalación de equipamento de xogos infantís dotado cunha valla de seguridade e instalación dunha fonte. “O custo ascende a uns 158.000 euros, a cargo do Concello e os veciño, e só queda por instalarlle unha especie de grella externa na praza, xa que neste espazo é onde se celebra a festa principal da localidade que será o vindeiro 25 de xullo”, recordou, “agora só nos queda chegar a un acordo cos veciños de A Rasela para facer un centro social e remodelar o de Ábedes, e deste modo quedarán rematados os espazos sociais e culturais neste concello”.