V Día da Bici Solidaria en Verín |
|
|
|
Luns, 01 Xullo 2013 10:23 |
A área de Deporte e Mocidade do Concello de Verín, a Asemblea Comarcal de Cruz Vermella Monterrei e o Club BTT Verín organizan a quinta edición do Día da Bici Solidaria, o próximo domingo 07 de xullo, baixo o lema ‘Pedalea con Cruz Vermella’.
Esta actividade, enmarcada dentro da campaña do Sorteo del Oro 2013, ten como obxectivo promocionar este deporte como actividade saudable e familiar, e recadar fondos, mediante a venda de boletos para este sorteo, destinados a accións en beneficio da comunicade na comarca.
A ruta, cun percorrido de 12 quilómetros de carácter familiar e escasa dificultade, iniciarase ás 10 horas na praza García Barbón de Verín. Ao finalizar a mesma, terá lugar unha festa infantil e a entrega de trofeos a: ciclista novel -participante máis novo-, ciclista veterano -participante de maior idade- e premio familiar -destinado á familia cun maior número de participantes na ruta- e á bicicleta máis orixinal (o evento non ten carácter competitivo, polo tanto os trofeos terán só carácter simbólico).
As inscricións e entrega de dorsais realizaranse o propio día a partir das 9.30 horas, na praza García Barbón. A participación é gratuíta, tan só aquelas persoas que queiran optar aos premios deberán comprar un boleto do Sorteo del Oro para obter o dorsal.
Para máis información poden contactar con Cruz Vermella a través do teléfono 988-410978 ou visitando a oficina de Verín.
|