Concello de Verín

O 'Obradoiro de graduado e corresponsabilidade', enmarcado no programa de redución de abandono escolar e organizado polo departamento de Educación Familiar do Concello de Verín, xa conta con 22 persoas inscritas, que recibirán durante estes meses de verán a formación educativa necesaria para poder presentarse á proba para maiores de 18 anos, que se celebrará o 12 de setembro no ESA (Educación Secundaria Adultos) en Ourense.

Algunhas das persoas participantes neste proxecto xa foron á convocatoria de maio, e estivéronse formándose durante todo o ano nos cursos programados na Casa da Xuventude de Verín, e agora poden repetir esta oportunidade co obxecto de obter o título de ESO. Se dividirán en dous grupos, que comezarán as clases o 22 de xullo, previa reunión que será convocada polo departamento de Educación Familiar.

O 'Obradoiro de graduado e corresponsabilidade', é unha actividade que, de maneira dinámica e con axuda de profesionais, está dirixida aos/as mozos/as que non teñen o título da ESO e coa mesma podan prepararse para acudir á convocatoria libre das probas no mes de setembro, tendo unha oportunidade única de obter este título, que lles axudará na súa vida, tanto para seguirse formando coma para o acceso ao mundo laboral. Os contidos deste obradoiro aséntanse en fomentar a autoorganización do traballo, educación positiva, convivencia cultural, empatía, constancia e demais conceptos específicos das materias que se están traballando para acadar o graduado.

Con todo, non se trata do único proxecto desenvolvido nestes meses, xa que tamén terá lugar o 'Curso en tecnoloxías da información e da comunicación', que ao igual que o  'Obradoiro de graduado e corresponsabilidade' teñen por obxecto o cumprimento da escolaridade obrigatoria, participación en programas destinados á infancia e mocidade, formación de persoas activas e desempregadas, e axuda na formación das persoas que non obtiveron titulación e que hoxe necesitan para o desenrolo do seu currículo. No caso do 'Curso en tecnoloxías da información e da comunicación', trátase dun programa experimental pioneiro que busca reenganchar aos/ás mozos/as que non remataron os estudos básicos, podendo así, de maneira intensiva e personalizada, obter a axuda requirida para seguir no mundo educativo. A titulación expedida polo Concello de Verín terá a posibilidade de ser homologada coma unha cualificación profesional de nivel 1, no Catálogo nacional de cualificación profesionais (PCPI-FP), obtendo así un titulo de ensinanza regrada. Con este fin, os contidos serán os que dispoña a Dirección Xeral de Formación Profesional e Ensinanzas Especiais e os obxectivos consistirán en cursar parte do PCPI de Informática, en concreto os módulos de “Tecnoloxías da Información e da Comunicación” e de “Realización de Operacións Auxiliares con Tecnoloxías”, que serán acompañados, máis adiante, por un módulo de “Formación en Centros de Traballo”(con prácticas no Concello de Verín.).