Concello de Verín

Eduardo Atanes Álvarez, poeta natural de Penaverde (Cualedro) residente en Verín desde o ano 1999, presenta mañá 2 de agosto, ás 20.30 horas, na Casa da Cultura de Verín o libro O sentir dos adentros.

No acto de presentación está previsto que compartan escenario co autor a delegada municipal de Cultura e Educación do Concello de Verín, María Corona Meixeira Romasanta, e o ex-conselleiro de Medio Rural, Castor Gago Álvarez, que falará do libro desde a súa perspectiva de lector e de coñecedor do entorno do poeta.

Eduardo Atanes Álvarez publicou o seu primeiro libro, Poemas dunha alma, dunha vida e dun corazón, como edición de autor, en maio do ano pasado. Dese texto intimista vendeu, a través do boca a boca, a tirada completa da edición de 350 exemplares (o texto que se vai presentar agora publicouno a editorial madrileña Liber Factory e recolle en 88 páxinas 78 poemas).

Eduardo Atanes Álvarez sufriu unha lesión medular hai 23 anos, nun mergullo desafortunado na praia viguesa de Samil. O accidente levouno, cando tiña 18 anos recen cumpridos, a ter que vivir nunha cadeira de rodas, truncándose as aspiracións dun mozo independente e deportista. Hai agora tres anos, a morte de seu pai foi o revulsivo que o levou a práctica diaria da creación escrita. Os versos de Eduardo Atanes transmiten os sentimentos dunha persoa que se define como autodidacta no ámbito literario e que busca a felicidade dentro das súas limitacións físicas.