Verín será a primeira parada de “O Camiño Inmersivo” |
Venres, 06 Setembro 2019 13:17 |
Hoxe, 6 de setembro, presentouse de xeito oficial O Camiño Inmersivo, una proposta cultural baseada no cine inmersivo que percorrerá Galicia como una actividade enmarcada na promoción do vindeiro Xacobeo 2021. A primeira parada desta iniciativa levarase a cabo mañá, 7 de setembro, en Verín. Neste acto presentación do proxecto participaron Emilia Somoza, Concelleira de Cultura, Educación e Festexo do Concello de Verín, Iago de Sant, Director do proxecto e algunhas actrices do equipo involucrando aos veciños nas súas improvisacións. Esta iniciativa introduce por primeira vez en España o concepto da inmersión, unha nova disciplina artística que converte aos observadores en personaxes dentro dunha historia guionizada, que ten a capacidade de cambiar en función das reaccións e perfís dos participantes. A diferenza do teatro inmersivo, estas experiencias inmersivas están concibidas para ser gravadas, e obter un produto audiovisual de calidade cinematográfica. Os responsables de “O Camiño Inmersivo” explicaron que “tomando o Camiño de Santiago ao longo dos séculos como fío condutor, as participantes terán a posibilidade real de viaxar no tempo a través das historias que se foron labrando no imaxinario dun pobo.” Verín será o escenario da súa primeira parada. Os participantes serán absorbidos como personaxes dunha historia que estará guiada por actores profesionais. Non se poden desvelar os detalles, pero si que coñecerán a un científico tolo, a peregrinos de todas as épocas e incluso ao mesmísimo Alfonso II. Todo está suxeito á improvisación e calquera pode ser artífice de moitos cambios. A programación para mañá, sábado, 7 de setembro, é a seguinte: 1. Cabina de contexto - Praza García Barbón - 11.00 horas. Darase a coñecer a inmersión e as fases que se levarán a cabo. 2.Porta Máxica - Tramo de entrada do Camiño de Santiago a Verín - 16.00 horas. Os asistentes poderán gozar de balde dunha inmersión ambientada e guiada duns 20 minutos de duración. O lugar exacto terá que ser descuberto polos participantes seguindo as indicacións do título: “Entrada do Camiño de Santiago a Verín”. 3. Portal do tempo - Praza da Merced - 19.00 horas. Situada nun lugar segredo desta praza ao que os participantes son levados tras a súa inscrición. Trátase da GRAN INMERSIÓN, estará guionizada e terá unha duración de 1 hora. O custo desta actividade final será de 30 euros por persoa. |