Esta fin de semana Verín foi un dos protagonistas, da man do Lar Gallego de Sevilla, na XI edición do Encontro de Casas Rexionais e Provinciais, organizado polo Ayuntamiento de Sevilla, que este 2019 homenaxeou á Casa de Cantabria.
O presidente do Lar Gallego de Sevilla, Alfredo Otero, o alcalde de Verín, Gerardo Seoane, e a concelleira de Educación Cultura e Festexos, Emilia Somoza, fixeron de anfitrións para recibir na caseta da casa rexional galega ao resto de presidentes das distintas casas rexionais e diferentes autoridades.
Esta edición a caseta do Lar Gallego vestiuse con imaxes de Verín; e entre verinesas, cigarróns e gaiteiros foron os encargados de compartir con todos os visitantes os produtos típicos da terra. Queixos, empanada galega, augas mineiro medicinais… acompañados dun gran viño grazas á D.O. Monterrei que quixo estar presente esta fin de semana en Sevilla cos seus mellores caldos.
O venres 11 de outubro tivo lugar a inauguración no Salón Colón do Concello hispalense, que contou co pregón de José Antonio Fernández Cabrero, Irmán Maior da Irmandade da Macarena onde asistiron Presidentes das diferentes Casas Rexionais e Provinciais e distintas autoridades. Durante todda a fin de semana, o son das chocas de máis de medio centenar de Cigarróns e as melodías da Banda de Gaitas do Concello de Verín encheron as rúas do centro da cidade. |