Concello de Verín

O Concello de Verín abre, até o día 30 de outubro incluído, o prazo de solicitudes para participar no Obradoiro do Cigarrón 2019 – 2020. Pechado o devandito prazo, ordenaranse as solicitudes aplicándolle dous criterios de preferencia: priorizaránse as que se fixeron para todas as actividades, fronte ás solicitudes de formación parcial, e, de seguido, a orde de entrada da solicitude.

Para que se fai

O Concello de Verín organiza desde o ano 1997 o Obradoiro de Cigarrón. Con esta iniciativa pretende que a máscara máis antiga e con máis significado patrimonial do Entroido verinense se manteña dentro duns canons de respecto polas formas tradicionais. Para iso, no Obradoiro ensinase a facer todos os elementos do cigarrón, salvo o pintado da careta e os compoñentes de produción industrial. O Obradoiro do Cigarrón serve tamén para transmitirlle aos participantes o calzado que harmoniza co traxe, que tipo de chocallos e cantos se deben levar, ou como vestir a máscara e utilizala en público.

Coñecementos previos necesarios

As persoas interesadas poden facer a máscara completa ou partes (traxe, careta), para o que terán que levar todos os materiais e instrumentos necesarios. No caso de que queiran facer o traxe, é indispensable ter coñecementos de confección con máquina e levala, de calceta e de ganchillado.

Calendario e horarios

As actividades formativas comezarán en novembro na Casa da Xuventude. As persoas que queren facer a máscara completa deberán ter libres as tardes dos luns e dos martes, das 16 ás 19:30 h. No caso de facer só a careta, os luns. Para facer só o traxe, os martes. No suposto de haber demanda para crear dous grupos, o segundo grupo tería as actividades de traxe os mércores e as de careta o xoves.

Prezo

Para participar en todas as actividades, a cota de inscrición é de 95 €. Se só se quere facer o traxe ou a careta, 75 €. Como o obxectivo é facer máscaras completas, acéptase que dúas persoas da mesma familia (consanguínea ou política, até 4º grao incluído) participen complementariamente, facendo unha o traxe e outra a careta, e  paguen 95 € de matricula entre ambas as dúas.