O adegueiro de Verín José Luis Mateo, un dos máis premiados da DO Monterrei, ven de materializar a cesión dun pipote carreteiro ao Museo do Claustro Mercedario, para a súa exposición no contexto da cultura enolóxica da comarca. “Temos que contar entre todos a historia do noso viño”, sinalou o cedatario, que oficializou onte o trámite co alcalde, Gerardo Seoane.
A peza, un barril cun deseño especial para ser transportado nun carro, ten un significado especial na comarca de Monterrei, cuxa producción se destiñaba nunha porcentaxe importante á venda tras o seu transporte. Os pipotes de carro mantiñan un deseño especial para poder ser cargados e desplazados habitualmente polos camiños, e esta peza provén da familia deste productor de Verín.
O veciño que cede a peza, José Luis Mateo, de adegas Quinta da Muradella, afirmou que “temos que contar entre todos a historia do noso viño”, porque “facer cultura do viño e aportar un elemento esencial para diferenciar o noso territorio”.
Mateo exhortou a todos a facer o mesmo, “porque todos temos pezas singulares que son dignas de contar unha historia especial sobre o noso pasado, e esa é a millor aportación que lle podemos facer á comarca de Monterrei”.
Relato para as xeracións futuras
Pola súa banda, o alcalde de Verín, Gerardo Seoane, agradeceu a cesión de José Luis Mateo, de quen destacou que “é un exemplo para toda a nosa comarca, tanto na súa excelencia profesional como personal”. Seoane destacou a importancia de “facer emerxer” este tipo de pezas que contan “dun xeito personal e intransferible a nosa historia”, e que contribúen “a construir un relato da nosa identidade e da nosa historia que quede para o futuro”.
Dende a súa apertura hai tres anos, o Museo do Claustro Mercedario ten abordado a difusión e interpretación da identidade da comarca de Monterrei, con especial atención á cultura do viño. Dende a súa primeira exposición, “Dionisos, 2000 anos de viño en Monterrei”, ata a actualidade, o museo foi desenvolvendo contidos relativos o cultivo, as características organolépticas do caldos de Monterrei, ou mesmo os seus destilados.
Recentemente, a Cidade da Cultura de Galicia solicitou o traslado da interpretación do conxunto escultórico “Dionisos e Ampelos” ao monte Gaiás, para a súa exposición na mostra “Galicia, un diálogo co mundo”, que albergará con motivo do Xacobeo 2021.
|