Concello de Verín

O Museo Claustro Mercedario de Verín está a organizar un evento especial para conmemorar a chegada aos seus primeiros 25.000 visitantes. Esta semana superou a franxa dos 24.700, unha cifra que puxo en alerta aos responsables deste centro para levar a cabo os preparatorios necesarios para dita celebración.

Seguindo coa afluencia de xente habitual nestas datas, está previsto que nas vindeiras semanas se acade a esperada cifra. Dende xa mesmo estará todo preparado para que o visitante número 25.000 sexa sorprendido polo alcalde da vila para un pequeno acto conmemorativo.

Dito visitante recibirá, de parte do Concello de Verín, un lote de obsequios que incluirán: material patrimonial divulgativo, un vale dunha cena para dous con produtos propios da comarca nun establecemento da vila de libre elección e máis un bono para acceder ás proxeccións que se realizarán no Festival Internacional de Cine Vía XIV.

O alcalde do Concello de Verín, Gerardo Seoane, expresou a súa alegría “por ver como brotan aquelas sementes que se plantaron vai menos de 3 anos.” Proba desto son as diversas iniciativas de particulares que estes días negocian co Concello de Verín a cesión dalgunhas pezas de interese público para o pobo e que proximamente pasarán a formar parte da colección do Museo.

O Museo Claustro Mercedario nacía no ano 2017 coa intención de servir de soporte para crear unha identidade comarcal sólida. A día de hoxe, grazas á súa oferta divulgadora, converteuse nun enclave cultural referente no sur de Ourense. A través dunha visión diferente, didáctica e coidada, ao máis mínimo detalle, coas técnicas de interpretación patrimonial máis modernas, o museo ofrece materiais sobre o primeiro contacto cos habitantes da comarca, a historia do viño e do contrabando do café. Ademais, tamén ten oco para exposicións temporais adicadas á concienciación e interpretación da natureza así como para numerosas actividades celebradas ao longo do ano buscando dinamizar a actividade cultural e patrimonial e loitando por crear esa identidade común tan necesaria na comarca.