Concello de Verín

O Museo Claustro Mercedario de Verín acolle, o vindeiro mércores, 13 de novembro, un dos actos principais das “Jornadas de Sostenibilidad del Camino de Santiago en la  Vía de la Plata”.  Dito proxecto busca dar a coñecer as oportunidades da cooperación e comercialización para fomentar a promoción do produto turístico da Vía da Prata, todo dende unha perspectiva sostible e combinando patrimonio, natureza, enoloxía e gastronomía.

Ao evento acudirán unha ducia de axencias de viaxes especializadas no Camiño de Santiago e procedentes de España, Portugal, Reino Unido e Irlanda, que entre os días 13 e 15 de novembro, percorrerán diversas localidades ourensás polas que discorre a citada Vía.

 Na súa parada por Verín, os asistentes poderán gozar dunha visita guiada polo Museo Claustro Mercedario seguida dunha mesa de reflexión sobre a sustentación da Vía da Prata. Neste acto debateranse temas como a revitalización destas zonas, os proxectos de conservación medioambiental e os distintos produtos turísticos que ofrecen e que a converten nunha experiencia única. Tras o coloquio, os asistentes poderán degustar produtos locais e viños da Denominación de Orixe Monterrei.

 O programa completo desta actividade é o seguinte:

19.30 horas: Visita guiada ao Museo Claustro Mercedario de Verín. “A Estela do Guerreiro de Castrelo do Val e a orixe da Vía da Prata”. Da man de Luís Cid Congil, comisario da mostra “Primeiros Contactos de Monterrei co Mediterráneo”.

20.00 horas: Mesa de reflexión sobre “la sostenibilidad de la Vía de la Plata”. Trataranse os seguintes temas:

- A Revitalización da Vía da Prata. Por José Luis Rodríguez Cid, presidente da Asociación Amigos da Vía da Prata – Camiño Mozárabe.

- Produtos Turísticos sostibles vinculados ao Camiño. Por Hugo Teixeira Francisco, co-founder & Managing Partner de Portugal Green Travel.

- A singularización da experiencia na Vía da Plata. Por Caroline Díaz. Personal travel manager. Walk the Camino.

- Proxectos de Conservación Medioambiental no Camiño. Por Bruno de Llano Gómez-Ulla. Especialista en Xestión local e autonómica de Ecoembes. Cabaleiro da Orde do Camiño de Santiago.

*A moderadora no debate será Emma González. Directora adxunta de Expourense e directora de Comunicación da Orde do Camiño de Santiago.

21.15 horas. Degustación de produtos locais con viños de Monterrei.

A xornada é de libre acceso pero prégase previa confirmación de asistencia a través do correo Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo . A organización informa de que partirá un transporte colectivo dende a cidade de Ourense ás 18.15 horas (Parque de San Lázaro, C/ Curros Enriquez – xunto á Subdelegación de Goberno). A hora prevista de volta é ao redor das 22.30  horas.

O evento está organizado por Expourense dentro do programa “O Teu Xacobeo”, financiado pola Consellería de Cultura e Turismo da Xunta de Galicia.