Concello de Verín

“Ver para ler” é o eslogan co que se presenta a actividade Cinema Marabillas, que o FIC Vía XIV desenvolve para achegar a maxia do cinema aos cativos e cativas de Verín e comarca. Como cada ano, escolares de diversos centros educativos da zona achegaranse ata o recinto do auditorio da vila para desfrutar dunha axenda de actividades deseñada especificamente para eles “con agarimo e co obxecto de que poidan gozar dela todos xuntos”, sinala o director do certame, Carlos Montero.

Nesta edición, o fío temático da actividade proposta, que se desenvolverá durante as mañás dos días 2, 3 e 4 de decembro, ligará o cine coa literatura infantil e xuvenil. Así, no marco do Festival programaranse algunhas das “primeiras adaptacións cinematográficas inspiradas nos contos e libros clásicos”, abunda Montero.

Historias que poden ser contadas de distintos xeitos

O obxectivo é facer ver aos máis pequenos que as diferentes historias que coñecen poden contarse de diversos xeitos.  Ao fío desta actividade, non faltarán a aventura, o misterio, a tenrura, os risos, a maxia, a fantasía e sobre todo moita imaxinación porque, como sinala o director do FIC Vía XIV, “a literatura ten sido e sempre será unha gran fonte de inspiración para o cine”.

Os protagonistas da actividade son personaxes ben coñecidas para todos os nenos e nenas, que teñen centrado algunhas das máis belas historias narradas no cine: Alicía no País das Marabillas, Peter Pan ou O Mago de Oz. Son todos eles cativos que reflexionan sobre o mundo no que viven. “Son fortes, sensatos e pensan por si mesmos. Reflicten as etapas evolutivas dos espectadores máis cativos e poden axudar a formar o seu pensamento crítico”, engade Montero.

Os cativos e cativas que participen na iniciativa poderán desfrutar tamén dunha mostra de curtas, aptas para todas as idades, seleccionadas pola organización do FIC Vía XIV.