Concello de Verín

ABANCA, Afundación e o Concello de Verín asinaron esta mañá un convenio de colaboración cultural mediante o cal o Grupo de Teatro Sénior de Afundación representará Os vellos namorados, unha versión de Os vellos non deben de namorarse de Castelao, na localidade. Asistiron á sinatura o alcalde do Concello de Verín, Gerardo Seoane; o coordinador de Negocio Institucional de ABANCA en Ourense, Mateo Alonso San Román; e a coordinadora Institucional de Afundación para Ourense e Lugo, Beatriz Fernández-Anguiano.

A representación de Os vellos namorados será mañá xoves 28 de novembro, a partir das 19.00 h, no Auditorio de Verín. A entrada é libre e de balde ata completar a capacidade. Esta iniciativa enmárcase no proxecto «Corrente cultural» de Afundación, que considera a arte como un instrumento imprescindible para fomentar o coñecemento e o desenvolvemento colectivo. Grazas a este proxecto, Afundación, a Obra Social de ABANCA, impulsa a capilaridade da cultura en Galicia, ampliando a oferta artística máis aló das súas sedes e trasladándoa ás localidades galegas para desenvolver tamén nelas as actividades da entidade. As iniciativas que conforman este ciclo parten dunha produción de nivel, con interese específico para a comunidade e unha estreita vinculación coas nosas tradicións e historia.

Esta farsa en tres actos e epílogo satiriza sobre o amor e a morte de tres vellos imprudentes. Tres amores tardíos, tres vellos que se namoran de tres rapazas novas e tres maneiras de enganalos neste xogo de comedia que amosa o medo humano á soidade e a necesidade de amar e ser amado.

O GRUPO DE TEATRO SÉNIOR DE AFUNDACIÓN

O grupo de teatro do Espazo +60 Afundación da Coruña fórmase no ano 1984, cando un grupo de socios e socias afeccionados se reúnen e comezan a dar os seus primeiros pasos representando monólogos e obras curtas. Coa axuda do seu profesor e director, Víctor Díaz Barús, ese mesmo ano debutan cunha obra de Molière, e organizan o I Encontro de Grupos de Teatro.

Na actualidade está integrado por 21 actores e actrices de idades comprendidas entre os 60 e os 90 anos. Algúns dos seus compoñentes participaron en varias series de televisión, como Mareas Vivas, Libro de familia ou Serramoura, en películas como O lapis do carpinteiro e en diferentes anuncios publicitarios. Durante a súa traxectoria, o grupo recibiu numerosos premios en certames de teatro afeccionado, tanto no ámbito galego coma no nacional.