Un total de 360 rapaces e rapazas participaron na primeira xornada de Cinema Marabillas, a actividade do FIC Vía XIV concibida para os escolares da comarca |
![]() |
![]() |
![]() |
Luns, 02 Decembro 2019 18:57 |
Un total de 360 escolares de Verín e comarca participaron hoxe na primeira xornada de Cinema Marabillas, a actividade do FIC Vía XIV de Verín deseñada para involucrar aos máis novos no certame. Rapaces dos colexios María Inmaculada e Amaro Refojo de Verín, do CEIP de Medeiros e do CEIP de Vilardevós tomaron hoxe parte na iniciativa, que se desenvolverá tamén mañá e pasado coa participación doutros centros educativos. “Ver para ler” é o eslogan co que se presenta a actividade Cinema Marabillas, que o FIC Vía XIV desenvolve para achegar a maxia do cinema aos cativos da man de Raquel Queizás. Nesta edición, o fío temático da actividade liga o cinema coa literatura infantil e xuvenil. Así, durante a mañá programaronse algunhas das primeiras adaptacións cinematográficas inspiradas en contos e libros clásicos. Personaxes ben coñecidas Os protagonistas desta actividade son, pois, personaxes ben coñecidas para todos os nenos e nenas, que teñen centrado algunhas das máis belas historias narradas no cine: Alicía no País das Marabillas, Peter Pan ou O Mago de Oz. Xunto a isto, os rapaces que participaron na iniciativa puideron desfrutar dunha mostra de curtas, apta para todas as idades, seleccionadas pola organización do FIC Vía XIV. Cámara e batuta A axenda do día do FIC Vía XIV completarase coa programación de diferentes curtas a concurso, enmarcadas nas categorías oficias “Outra Mirada 1”, “Horizontes 2”, “Outra Mirada 2”, “A Raia 3” e “Nova 3”. O Auditorio de Verín e a Casa da Cultura son os escenarios nos que se proxectarán as diferentes sesións. Xunto a isto, xa pola noite, desenvolverase no Auditorio a actividade paralela “Cámara e batuta”, que pretende analizar a relación íntima que posúen música e cinema a través dun percorrido moi especial que realizará Edelmiro L. Mateo, responsable da Coral Polifónica de Verín. No marco desta actividade, na que participara a propia Coral, tamén haberá unha actuación da Agrupación Instrumental Infantil do Conservatorio de Verín, dirixida por Miguel Ángel Guerra.
|