Verín converterase no epicentro da Novela Negra en xaneiro |
![]() |
![]() |
![]() |
Mércores, 18 Decembro 2019 11:30 |
O Auditorio de Verín acollerá durante os días 24 e 25 de xaneiro a terceira edición das súas xornadas de Novela Negra, este ano dedicada aos personaxes deste xénero literario. Así o confirmaron esta mañá a concelleira de Cultura, Emilia Somoza, e os organizadores do evento, Vicente Rodríguez Xusto, director da Biblioteca Municipal e Miguel Losada, secretario de SAGA. As xornadas “Personaxes de Novela”, organizadas conxuntamente pola Biblioteca do Concello de Verín xunto e pola Sociedade Antropolóxica Galega (SAGA), teñen por obxectivo dar unha visión real sobre as personaxes que nelas normalmente aparecen. Para iso, Verín contará coa presenza de reputados escritores e profesionais que falarán en profundidade sobre moitas das claves deste xénero literario. «Nesta edición, pareceunos máis orixinal saír do que normalmente este tipo de certames ofrecen. Este ano, o lema das xornadas é “Personaxes de Novela” e pretendemos que sexa un percorrido polas tripas mesmas dunha realidade que transcende o literario e camiña na escuridade da psique humana. Detrás desta literatura podemos atopar as luces da creatividade chovendo sobre as teclas, mais tamén as sombras da que bebe tantas veces a narrativa humana», destacou Miguel Losada, secretario de SAGA.
A Novela Negra, tan vizosa sempre no panorama editorial, é un fetiche social que protexe e esconxura contra ese escuro atavismo como son as formas da violencia. Escribila é todo un rito, unha catarse sen volta atrás porque o imaxinado, neste caso, non resulta ser inventado. Mais ben recreado. «Nesta ocasión, e como oficiantes taumaturxia da palabra escrita» – explicou Vicente Rodríguez - «contaremos na Biblioteca do Concello de Verín a curtidos relatores e referentes da intrahistoria dun xénero que, cando non é xornalismo, borboriña as palabras que tantas noites prenden nos nosos ollos dende as fonduras, e mesmo abismos, da natureza humana». Para finalizar, a concelleira de Cultura, Emilia Somoza, quixo felicitar aos organizadores por traer a Verín unha proposta tan completa e atractiva e realizou un chamamento aos amantes deste xénero negro e policiaco a achegarse a vila do Támega e gozar deste programa de “primeiro nivel”. VENRES 24 19:30h.: “Do contrabando de tabaco ao tráfico de drogas en Galicia” - D. Enrique León Calviño, ex comisario de Vilagarcía, figura que deu vida na serie Fariña de Antena 3 o actor Tristán de Ulloa. 20:15h.: “O corpo do delito” - D. Fernando Serrulla Rech, médico Forense e antropólogo forense responsable da Unidade de Antropoloxía Forense do Instituto de Medicina Legal de Galicia. - D. José Antonio Vázquez Taín: Xuíz/Escritor. SÁBADO 25 18:30h.: «A novela negra como radiografía da realidade social» - D. José Antonio Vázquez Taín: Xuíz/Escritor. 19:15h: “A forma do lume” - D. Pedro Feijoo Barreiro, escritor de novela negra. 20:15h.: Mesa Redonda: Enrique León Calviño, Fernando Serrulla Rech, José Antonio Vázquez Taín, Pedro Feijoo Barreiro. Modera a mesa: Xurxo Salgado, xornalista que dirixe Galicia Confidencial.
Ao remate da mesa redonda clausuraranse as xornadas e os autores asinarán libros.
+ info: http://novelanegra.bibliotecadeverin.es
+ info: http://novelanegra.bibliotecadeverin.es |