Concello de Verín

O Concello de Verín e a Asociación Española Contra o Cancro de Ourense realizaron a firma do convenio de cesión dunha nova sede local da asociación en Verín, cuxo espazo está situado na rúa Rosalía de Castro, 4 (edificio antigo lavadoiro).

Un espazo que pretende crear comunidade na vila para acompañar a pacientes con cancro e as súas familias durante o proceso da enfermidade. Está deseñado para dar resposta a todas as necesidades das persoas afectadas desde os programas e servizos da organización.

A firma do convenio estivo representada polo presidente da sede provincial da asociación en Ourense, Germán Rodríguez-Saá, e a concelleira responsable da área de benestar social no Concello de Verín, Rosario Rodríguez. Tamén presenciaron o acto varias voluntarias, voluntarios, medios de comunicación, etc.

O presidente Germán destacou: “Para nós, ter un concello como Verín con tan boa disposición é de agradecer por cedernos un espazo como este para continuar crecendo. É a nova maneira de responder a quen o necesita, cubrindo as súas novas necesidades e poñendo á súa disposición os avances para que ningunha persoa poida sentirse soa ou desatendida.”

A concelleira Rosario Rodríguez engadiu: "Para o Concello de Verín, a presenza e colaboración da AECC supón unha fonte fundamental de apoio psicolóxico, social e orientación médica, entre outros servizos e programas. Estamos profundamente agradecidos por poder continuar esta colaboración e valoramos enormemente o compromiso e dedicación do voluntariado e do equipo profesional da asociación."

O presidente Germán Rodríguez-Saá presentou os resultados anuais da sede provincial da asociación en Ourense durante o ano 2023

Posteriormente a firma do convenio de cesión, o presidente da asociación en Ourense, Germán Rodríguez-Saá, presentou o balance anual da sede provincial durante o ano 2023.

Cabe destacar os datos máis significativos dos resultados anuais: En atención psicolóxica, supuxo un incremento de beneficiarios totais de 249 a 292. Houbo 1.329 sesións con beneficiario.

Dentro da atención social, os beneficiarios totais aumentaron a 412, onde a media de sesións sitúase en 2/3 por beneficiario. Realizáronse 73 préstamos de material no último ano e 65 perrucas. Destacan talleres de mobilidade articular, pilates, ioga, economía doméstica, orientacións xurídicas, higia confort, saúde bucodental, etc.

En información e prevención destácase a realización de charlas informativas sobre programas e servizos en diferentes puntos da provincia, charlas para familiares en duelo, e as iniciativas destacadas “Rutas Saudables” e “Espazos Sen Fume”.

Dentro do voluntariado, incrementouse en 51 persoas o último ano, chegando a 200 persoas voluntarias, e a implantación de campañas de voluntariado pola provincia.

En canto á investigación, a contribución da Asociación en Ourense aumentou o financiamento de proxectos de 81.301 euros a 99.058 euros. Destacar a concesión da primeira axuda nacional de investigación en Ourense á oncóloga Carme García para o desenvolvemento dun proxecto de investigación sobre a prevención do cancro colorrectal, cun valor de 140.000 euros.

Por último, a captación destacou en diversos datos. O número de socios/as pasaron de 4.704 a 5.127, cun crecemento de socios novos de 358 a 421 no 2023. A campaña da Colecta (Cuestación) conseguiu un porcentaxe de crecemento dun 84% pasando de 9.918 euros a 18.307 euros. A Lotaría do Nadal tamén aumentou o seu importe de recadación, con 9.800 euros. A evolución presupostaríacreceu de 618.812 euros no ano 2020 a 932.438 euros no ano actual.