Concello de Verín

A próxima edición da Feira do Viño de Monterrei xa conta con cartel anunciador. A proposta seleccionada, de Raúl López Martín, foi elixida entre un total de 73 traballos presentados ao concurso impulsado polo C.R.D.O. Monterrei.

Xosé A. Touriñán, o gran nome do panorama audiovisual galego, chega a Verín. O sábado 31 de agosto a vila acollerá as dúas grandes propostas do humorista. Por unha banda, presentará a súa primeira curta documental “Nena”.  Ademais, o público do FIC Vía XIV Verín poderá gozar tamén do seu monólogo “Aquí Tou!”. As entradas para este último espectáculo xa están dispoñibles en ataquilla.com e, para a curta, poderán adquirirse antes do seu comezo nas canles habituais de reservas do festival. Ambos espectáculos terán lugar no Auditorio Municipal de Verín.

O presidente do C.R.D.O. Monterrei, Jonatás Gago, e o alcalde de Verín, Gerardo Seoane, ratificaron un convenio de colaboración entre as dúas entidades para a organización da XVII Feira do Viño Monterrei, que se celebrará do 09 ao 11 de agosto.

A Asociación Cultural Folclórica O Fiadeiro, entidade sen ánimo de lucro comprometida coa recuperación e promoción da cultura tradicional galega, ofrecerá un espectáculo o vindeiro sábado 29 de xuño, ás 12:00 da mañá, na Praza García Barbón. O mesmo está enmarcado no programa Danza3, promovido pola Axencia Galega das Industrias Culturais.

O Concello de Verín foi un dos catro escenarios elixidos para promover a protección do recurso hídrico a través da arte muralista, grazas á segunda edición do Concurso de Murais “People & Planet”. Esta iniciativa, organizada polo Fondo Galego de Cooperación e Solidariedade e financiada pola Unión Europea, reúne propostas de artistas de diversas partes do estado para ilustrar o Obxectivo de Desenvolvemento Sostible número 6: garantir a dispoñibilidade de auga e a súa xestión sustentable e o saneamento para todas as persoas.