Concello de Verín

As cifras son claras: 1 de cada 4 persoas presentará unha enfermidade mental ao longo do seu vida. Diagnosticadas ou non, xunto a estas persoas tamén se encontran os seus familiares e achegados. Todos, tamén os profesionais do ámbito da saúde mental, soportan día a día o estigma e a discriminación asociados á enfermidade mental. Subliñando a gravidade das súas consecuencias, revindicamos a erradicación desta eiva que chega a tal punto que mesmo desalenta as persoas a recoñecer  que teñen un problema de saúde mental, solicitar axuda e seguir un tratamento.

Novamente, e non nos cansamos de repetilo porque precisamente dúas das nosas razóns de ser son informar e formar á sociedade sobre os trastornos mentais para evitar o descoñecemento e o rexeitamento, as persoas con enfermidade mental poden levar unha vida como calquera outra persoa. Son innumerables os exemplos dos que teñen unha familia, unha rede social, un emprego e, en definitiva, un proxecto de vida.

É necesario que entre todos/as colaboremos en mellorar a saúde mental, tanto para evitar a aparición de problemas como para facilitar a recuperación das persoas que os teñen. As ferramentas xa as temos, aínda que ben é certo que sen unha implantación suficiente e axeitada. Por iso, recordamos que na actualidade dispoñemos dun marco lexislativo que recolle iniciativas como a "Lei de Promoción da Autonomía Persoal e Atención ás Persoas en Situación de Dependencia" e a "Estratexia en Saúde Mental do Sistema Nacional de Saúde", entre outras. É importante sinalar que este último documento foi aprobado por todas as Comunidades Autónomas, e que favorece cuestións como a prevención de condutas de risco e a educación en saúde, a detección precoz, a erradicación do estigma, a investigación e a formación de profesionais de saúde mental.

A rede de atención á saúde mental no Estado aínda presenta carencias importantes sobre todo no relativo á abordaxe sociosanitaria, ao ámbito comunitario e de medidas integrais que incidan en aspectos formativos, educativos, laborais, de ocio e tempo libre, familiares, etc. Polo tanto, é preciso seguir desenvolvendo sistemas de atención á saúde mental, especialmente do ámbito comunitario pola súa eficiencia e eficacia, e evitar recortes na investimento neste ámbito. A saúde mental non é, nin máis nin menos, que un asunto que nos afecta a todos dunha forma extraordinariamente similar.

No concernente ao deseño, desenvolvemento e avaliación de políticas sobre saúde mental, manifestamos o dereito a que as persoas con algún trastorno mental exerzan unha participación absolutamente activa. Tal e como reclamou o propio Comité de Persoas con Enfermidade Mental de FEAFES en diferentes ocasións, a participación é un dereito inherente á condición de cidadáns/ás que sen dúbida ningunha facilita os procesos de recuperación, de mellora da calidade de vida e de inclusión social.

Este cambio de perspectiva non é algo exclusivamente do movemento asociativo de persoas con enfermidade mental e familiares. Xa dende a propia Convención da ONU sobre os Dereitos das Persoas con Minusvalidez, ratificada por España e que polo tanto obriga a adaptar as nosas leis, reclámase un cambio cara ao modelo social da minusvalidez para evitar custe o que custe a exclusión social. Polo tanto, hoxe tamén reivindicamos que o noso ordenamento xurídico axústese ao establecido na Convención e revísense figuras xurídicas incompatibles con esta norma.

En definitiva, manifestamos o noso compromiso e solicitamos o propio ao goberno estatal, a as administracións autonómicas e locais, sociedades científicas, organizacións non gobernamentais, institucións académicas, medios de comunicación e sociedade no seu conxunto, para seguir loitando contra o estigma, defendendo os dereitos das persoas con enfermidade mental e os seus familiares, promovendo o empoderamiento e a recuperación das persoas con problemas de saúde mental, e apostando polo modelo comunitario de atención á saúde mental.

E é que nós así o creemos: Tan só hai que mirar de fronte á saúde mental para salvagardala.

A.F.E.M. Morea Verín

Tfno. 988-4122557

www.morea.org

Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo