Concello de Verín

O Concello de Verín quere trasladar as súas máis sentidas desculpas a todas as persoas que asistiron ao Xoves de Comadres e non puideron gozar da actuación da Orquestra Marbella debido a un fallo técnico imprevisto na súa mesa de son. A propia orquestra, responsable da infraestrutura técnica do evento, informou desta incidencia tras comprobar que o sistema funcionaba correctamente durante as probas previas.

Agradecemos o esforzo do equipo técnico da Orquestra Marbella, que traballou intensamente durante máis de dúas horas na busca dunha solución, así como a profesionalidade e rapidez dos DJ’s de Gramola e Enjoy, que permitiron que a festa continuase ata o seu remate. Lamentamos este contratempo e agradecemos a comprensión do público asistente, que unha vez máis demostrou o seu espírito festivo e o seu compromiso co Entroido de Verín.

Porén, a noite de Comadres quedou tristemente marcada por unha tráxica perda. Con inmensa dor, confirmamos o falecemento dun operario da orquestra Marbella, de 52 anos, debido a un infarto fulminante mentres realizaba tarefas de desmontaxe do escenario. A pesar da rápida intervención dos servizos de emerxencia, non foi posible reanimar á vítima.

Desde o Concello de Verín, queremos trasladar o noso máis fondo pésame aos seus compañeiros, amigos e familiares neste momento de inmensa dor. Pedimos tamén á cidadanía e aos medios de comunicación que traten esta traxedia con respecto e sensibilidade, evitando especulacións ou difusión de información que poida aumentar o sufrimento da familia e achegados.

O Entroido de Verín é unha celebración que nos une como comunidade e que vive grazas ao esforzo de moitas persoas que traballan con dedicación para que cada evento sexa un éxito. O noso compromiso segue sendo garantir que estas festas transcorran con seguridade e co respecto que merecen tanto o público como os profesionais que fan posible esta tradicional festa..