Concello de Verín

O Concello de Verín vén de publicar o anuncio oficial para a contratación de persoal laboral temporal, co obxectivo de reforzar os servizos municipais de Axuda no Fogar – Dependencia e Socorrismo.

O proceso selectivo rexerase polas bases xerais de contratación de persoal laboral temporal e polas bases específicas para a creación de bolsas de emprego, publicadas no Boletín Oficial da Provincia de Ourense número 34 do 11 de febreiro de 2020.

As persoas interesadas dispoñen de cinco días naturais para presentar a súa solicitude a partir do día seguinte á publicación do anuncio oficial. A documentación requirida, así como os anexos necesarios (I, II e III), atópanse dispoñibles na sede electrónica do Concello de Verín (apartado Tablón de Anuncios – Emprego Público) e tamén no taboleiro de anuncios da Casa do Concello.

Requisitos principais

-  Auxiliar de Axuda no Fogar – Dependencia:
Deberase estar en posesión dun curso, certificado ou título relacionado coa atención sociosanitaria ou coidados auxiliares de enfermaría, conforme o disposto no Decreto 99/2012 do 16 de marzo.

- Socorrista:
Requírese titulación mínima de Graduado en ESO ou equivalente, ademais do carné de socorrista homologado.

O concelleiro de Persoal, Réxime Interior, Deportes e Conservatorio, Diego Lourenzo Moura, destacou que “estas contratacións contribúen a reforzar os servizos municipais que atenden á veciñanza, garantindo unha resposta profesional e eficaz nas áreas máis sensibles, como a atención ás persoas dependentes e a seguridade nas instalacións municipais”.

Toda a información e documentación asociada á convocatoria pode consultarse en https://verin.sedelectronica.gal.