Concello de Verín

O Concello de Verín, en colaboración coa Asociación Vía XIV, inaugura o vindeiro sábado 20 de decembro ás 20:15 horas na Sala de Exposicións Municipal a mostra fotográfica “Alén do lago”, do fotógrafo verinés Carlos Folgoso Sueiro, Premio Galicia de Fotografía Contemporánea. A exposición poderá visitarse ata o 31 de xaneiro, en horario de 10:30 a 14:30 h; e de 16:00 a 18:30 h. (luns a venres).

Alén do lago” propón unha viaxe visual e simbólica pola Galicia máis profunda, construída a partir de imaxes de gran forza estética e narrativa. Tal e como sinala a crítica de arte e fotografía Magali Duzant, trátase dunha obra na que o autor «tece unha epopea contemporánea de loita, supervivencia e conexión na súa Galicia natal», atravesada pola memoria, o pasado e a identidade colectiva. Duzant destaca que Alén do lago é unha exposición construída a partir de imaxes «á vez misteriosas e metafóricas», nas que o autor logra crear un relato que vai máis alá do visual. Segundo sinala, a serie transmite «unha sensación de vidas paralelas e entrecruzadas» que acompañan ao espectador ao longo do percorrido, facendo da mostra unha experiencia aberta e suxestiva. Encontrámonos ante unha obra que non ofrece lecturas pechadas – sinala a crítica de arte- senón que convida a mirar con calma e a establecer unha conexión persoal coas imaxes, reforzando así o seu carácter narrativo e emocional.

O proxecto sitúanos nun tempo indeterminado, cunha ollada que aborda cuestións como o abandono do rural, a despoboación, a crise climática, a emigración ou as feridas sociais herdadas, sen caer nunha lectura documental directa. As fotografías, lonxe de seren imaxes crúas, están envoltas nunha estética cinematográfica, pictórica e alegórica, cunha iluminación coidada que constrúe atmosferas cargadas de emoción e simbolismo. «Somos o resultado do noso pasado», afirma o propio autor, unha idea que vertebra todo o proxecto e que conecta as historias individuais cun relato colectivo máis amplo.

A exposición establece tamén un diálogo con diversos universos artísticos e culturais, con referencias visuais que evocan o cinema de Andrei Tarkovski ou a pintura de Rembrandt, Francis Bacon ou Mark Rothko, abrindo unha conversa entre Galicia e o mundo desde unha mirada contemporánea. A escuridade, a tristura e o silencio convértense aquí en metáforas, mais tamén deixan espazo para a conexión humana, a resistencia e a esperanza: unha mirada sostida, un xesto, un abrazo que - cunha luz casi mística- interpela directamente ao espectador.

A exposición está comisariada por Mark Zlick, quen destaca que as fotografías de Carlos Folgoso «van máis alá dun instante detido, pois conteñen tempo e convidan a pensar no que ocorreu antes e no que está por vir». Segundo o comisario, trátase de imaxes «situadas no límite entre a luz e a escuridade e nos límites do que nos define como sociedade», un traballo que transcende o documental para cuestionar símbolos e xerar un diálogo aberto co espectador arredor do cambio, da memoria e da maneira na que nos relacionamos co mundo que nos rodea.

A concelleira de Turismo, Cultura e Festexos, Samanta Barreira, destacou que esta exposición «é unha mostra máis da firme aposta do Concello de Verín polo talento local, neste caso un exemplo profesional que conseguiu proxectarse a nivel internacional sen perder o vínculo coa súa terra». Barreira subliñou tamén a «especial ilusión que supón traer de volta a Verín a un creador “da casa” como Carlos Folgoso Sueiro, cunha traxectoria recoñecida en todo o mundo, para que a veciñanza poida gozar na súa propia vila dunha obra de enorme calidade artística e profundidade narrativa.»

Sobre Carlos Folgoso Sueiro

É un fotógrafo verinés cunha sólida e recoñecida traxectoria internacional. Durante máis dunha década desenvolveu o seu labor como fotógrafo con base entre Italia e Rusia. Durante ese período realizou proxectos fotográficos sobre as minas de diamantes de Siberia ou sobre o éxodo de refuxiados de Oriente Medio e cubriu acontecementos de grande impacto informativo como a crise migratoria no Mediterráneo, a traxedia de Lampedusa, o éxodo de persoas refuxiadas de Oriente Medio, o relevo papal de Bieito XVI a Francisco, cumios do G8 ou diversos desastres naturais. O seu traballo foi publicado en medios como National Geographic, Geo, Stern, Vanity Fair, The Guardian, Der Spiegel ou The Sunday Times, e exhibido en museos como o do Hermitage en San Petersburgo, e institucións culturais e festivais internacionais en Europa, Rusia e Estados Unidos. Ao longo da súa carreira foi recoñecido con numerosos premios, entre eles, dous International Pictures of the Year, un Vital Impacts, un Sony Award e un Premio Galicia de Fotografía Contemporánea. Tras unha lesión sufrida en 2020 orientou a súa obra cara a proxectos de longo percorrido, nos que afonda unha mirada autoral sobre a memoria, a identidade e o territorio.

Sobre Mark Zlick

Fotógrafo, director creativo en Zlick. Editor en AmordeMadre Editora. No pasado foi comisario en SalaSal e director do festival de fotografía VISIONS da Cidade Vella da Coruña. Zlick / toolsforcreativity é un estudo de fotografía, vídeo e obradoiro de impresión Fine Art na Coruña, un punto de encontro para a experimentación e o desenvolvemento de ideas onde se combina a paixón pola imaxe coa máis alta calidade en reprodución e produción editorial. Zlick é unha comunidade creativa, un espazo onde compartir coñecementos, explorar novas técnicas e apoiar a quen desexa levar as súas ideas máis alá.