Concello de Verín

Os mozos e as mozas de Verín que queiran participar nun Obradoiro de Teatro Cómico con 15 horas de formación gratuíta, poden inscribirse até o venres día 03 incluído no Negociado de Cultura do Concello de Verín, na Cruz Vermella; nos IES Xesús Taboada Chivite, García Barbón e Castro de Baronceli; no Colexio Privado Plurilingüe María Inmaculada  e no Colexio Apostólico Mercedario.

O día 01 de outubro, coincidindo coa celebración do Día Internacional das Persoas de Idade 2014 “Sen esquecer a ninguén: promoción dunha sociedade para todos”, o Concello de Verín promove a campaña de sensibilización social  '¡¡¡Dona AMOR!!!', que ten por obxecto conmemorar esta data así como alzar a voz sobre unha das situacións que transitan en silencio un número cada vez maior de persoas maiores: a soidade non desexada: “Devolvamos ás persoas maiores o cariño, coidado e tempo que nos dedicaron” (Plan Xerontolóxico Municipal de Verín).

O Centro Social, Cultural e Desportivo de Vilarelho da Raia, en colaboración coa Eurocidade Chaves-Verín AECT e diversas entidades do Municipio de Chaves e da Comarca de Verín-Monterrei, organiza o 05 de outubro o tradicional Paseo raiano, este ano dedicado aos antigos pobos promiscuos (Cambedo, Lamadarcos e Soutelinho da Raia), no ámbito das conmemoracións dos 150 anos do Tratado Internacional de Límites, celebrado o 28 de setembro de 1864 entre Portugal e España, que marcaron as comunidades raianas dos concellos de Chaves, Verín e Oímbra.

O vindeiro venres 03 de outubro, de 18 a 19.30 horas, a Biblioteca Pública Municipal de Verín programa a iniciativa 'Contos do Bosque', no marco da programación de actividades destinadas ao fomento da lectura e dinamización da instalación municipal.

Os concellos de Verín, Monforte, Mos, Ponteareas e Tui terán acceso a servizos dixitais da Administración electrónica que ofrece o Estado. Estes municipios son os primeiros en adherirse ao convenio asinado no seu día pola Axencia para a Modernización Tecnolóxica de Galicia (Amtega) e o Ministerio de Facenda e Administracións Públicas, que permite á Administración autonómica actuar como nodo de interoperabilidade, facilitando a conexión das entidades locais a servizos proporcionados polo Estado.