Concello de Verín

A partir de maña, e ata finais de setembro, o  Auditorio Municipal de Verín acollerá a exposición ”Verín, o ferrocarril soñado” de Alberte Blanco Casal. Sobre os soños de homes adiantados ao seu tempo, como André, Eduardo Chao ou Gallego Bazal vai esta exposición, baseada no traballo de investigación “O conflito de intereses no camiño de ferro de Zamora a Ourense”, editado pola Deputación de Ourense en 2015, e do que é autor o profesor Alberte Blanco Casal.

A Feira do Viño da Denominación de Orixe Monterrei, que se celebrará en Verín entre os próximos 12 e 14 de agosto, contará coa participación de 16 das 24 adegas que conforman a D.O, idéntico número que en 2014. Esta cifra evidencia, segundo destacou a presidenta do Consello Regulador da D.O Monterrei, Asunción Rodríguez Zarraquiños, nunha rolda de prensa celebrada esta mañá no Concello de Verín que "o interese dos adegueiros da comarca por tomar parte na iniciativa consolídase". Na súa intervención, Asunción Rodríguez aproveitou, ademais, para agradecer a todas as adegas participantes a súa implicación na XI edición da Feira, cuxo acto de inauguración terá lugar na Alameda de Verín o próximo 12 de agosto a partir das 20,00 horas.

Onte, 22 de xullo, o servizo da ludoteca de Verán – Campamento Urbano do Concello de Verín organizou, con motivo da festividade do día de Galicia, unha xornada de xogos na que participaron cento trinta nenos/as integrantes deste servizo de conciliación e coeducación.

O Goberno municipal de Verín desmentiu hoxe rotundamente as afirmacións de Jiménez Morán sobre a perda de fondos do Ministerio de Facenda por parte do Concello. Tal e como consta nos xustificantes recibidos no consistorio, o Ministerio recoñece que xa conta con toda a información contable requirida, e que procederá a librar as subvencións para Verín sen que se perda ningún fondo.

O alcalde de Verín, Gerardo Seoane, fíxose eco hoxe dos actos vandálicos que se produciron, durante a madrugada do venres na Praza da Alameda, nos que un/uns descoñecido/s arrincaron unhas cen plantas recentemente plantadas, como parte do proxecto de adecuación da Praza da Alameda que esta levando a cabo nestes momentos o ente municipal.