Concello de Verín

A Casa do Escudo do municipio ourensán de Verín acolle a partir do vindeiro luns, 21 de novembro, a exposición ‘Os Obxectivos do Milenio 2000-2015’. A mostra, organizada polo Concello de Verín en calidade de membro do Fondo Galego de Cooperación e Solidariedade, permanecerá aberta ata o 15 de decembro, e pode visitarse de luns a sábado, das 10 ás 14 e das 16.30 ás 20.30 horas.

Do 24 ao 27 de novembro, a Asociación de concellos das comarcas Monterrei e Conso Frieiras para o plan de competitividade turística e a Asociación de Empresarios de Turismo e Hostalería Portas de Galicia participarán na Feira Internacional de Turismo de Interior (INTUR), que se celebra en Valladolid.

Mañá, o salón de actos da Casa da Cultura de Verín acollerá, a partir das 18.30 horas, os relatorios ‘Educación intercultural e negociación de conflitos’ e ‘A música como mellora das relacións interxeneracionais’, enmarcados no curso 'Mediación e resolución de conflitos interxeneracionais', organizado polo Centro Asociado da UNED en Ourense e o departamento de Educación Familiar do Concello de Verín.

O salón de actos do IES García Barbón de Verín acolleu esta mañá o espectáculo ‘Contos coas mans abertas’ da compañía compostelá A Tropa de Trapo, co obxecto de conmemorar o Día Internacional para a Tolerancia.

A xira 2011 do espectáculo ‘Contos coas mans abertas’, promovida polo Fondo Galego de Cooperación e Solidariedade dentro das súas actividades de sensibilización, chega á vila ourensá de Verín mañá mércores 16 de novembro, coincidindo coa conmemoración do Día Internacional para a Tolerancia. A representación, organizada polo Concello de Verín en calidade de membro da entidade municipalista, terá lugar no IES García Barbón ás 10.30 horas.