Concello de Verín

A  Casa da Cultura de Verín acollerá do 25 ao 28 de outubro, en actos que comezarán as 19 horas o ciclo Ver, ler; falar e amizar, que pretende servir como reflexión, a través de diversos coloquios, sobre a lingua, a literatura e a muller na fronteira galego-portuguesa. O ciclo está organizado polo Concello de Verín e a Eurocidade Chaves-Verín, e conta co patrocinio da Secretaría Xeral de Política Lingüística.

A Biblioteca Pública Municipal do Concello de Verín organiza, con motivo da celebración do Día Mundial das Bibliotecas, unha actividade cultural o vindeiro sábado 23 de outubro, de 11.30 a 13.30 horas, enmarcada dentro da programación de actuacións destinadas ao fomento da lectura.

Durante a celebración da Feira Internacional de Turismo Termal “Termatalia” 2010, a Eurocidade Chaves-Verín presenta o seu novo stand promocional, destinado a divulgar os recursos naturais, termais e históricos de ambos municipios.

A Casa do Escudo acolle até o día 29 de outubro a exposición Non queimes o futuro. Mostra para a concienciación ambiental no Ano Internacional da Biodiversidade, organizada polo Obradoiro Nómade Antela, coa colaboración da Consellería de Medio Rural, Asociación Socio-Pedagóxica Galega e Concello de Verín.

Un total de 480 alumnos/as alumnos/as verinenses de infantil e primaria do CEIP Amaro Refojo, CEIP Princesa de España e Colexio María Inmaculada visitan a exposición ‘Artes Plásticas e Actividades da Eurocidade Chaves-Verín’, organizada para amosar os cadros dos vencedores da primeira edición do Concurso Fotográfico ‘Recursos históricos e naturais da Eurocidade’ e o destinado a creación da mascota ‘Chavín’.