Concello de Verín

A V edición do Festival Internacional de Curtas, FIC Vía XIV, de Verín baixou hoxe o pano cun acto de clausura conducido pola comunicadora Iria Sobrado, no que se entregaron os premios ás mellores curtas encadradas nas diferentes categorías. Traballos de Bélxica, Canadá, Suecia, España e tamén un feito en Galicia (con selo verinés) coparon o palmáres nesta edición 2020 do certame, celebrado baixo un estrito protocolo de seguridade anti-Covid.

O prolífico actor galego Luis Zahera, con ampla experiencia en cinema, televisión e teatro e gañador dun Premio Goya ao Mellor Actor de Reparto en 2018 por El Reino, reinou hoxe en Verín ao lograr colgar o cartel de completo no Auditorio, onde interviu no marco da homenaxe que a organización do FIC Vía XIV lle rendeu. Deste xeito, Zahera recolleu a testemuña de Mabel Rivera, a actriz que foi recoñecida na anterior edición do certame.

O público verinés desfrutou no Auditorio este xoves, día 10, dunha selección de curtas de creadores galegos e internacionais programadas en edición anteriores do Festival de Cine Play-Doc de Tui, con “diferentes tendencias e narrativas cinematográficas, que van dende o relato autobiográfico ao cine experimental, pasando polo retraso ou propostas de corte máis etnográfico”, segundo asegurou o director deste certame, Ángel Sánchez, durante a súa conexión por streaming co FIC de Verín.

Como parte da axenda da actividades paralelas da vindeira edición do FIC Vía XIV, Verín acolleu hoxe a estrea do documental histórico Hijas de Galicia, Macorinas, dirixido por Xosé Lois Santiago “Pello” e Fran Naveira. Trátase dun traballo que busca saldar una débeda histórica sobre un asunto en torno ao cal ata agora se gardara silencio:  a historia de explotación sexual á que se viu sometida unha parte da emigración feminina galega a Cuba, a comezos do século XX.

Con cheo total de aforo, e moito público procedente de Laza, o Auditorio de Verín acolleu este serán a estrea oficial do documental Entroidar, dirixido polo compostelán Pablo Ces. Un traballo que se centra en divulgar o carácter especial e a singularidade do Entroido lazano, “un  lugar no que este se vive case coma unha relixión”, segundo asegura Ces.