Concello de Verín

O vindeiro día 07 de febreiro, o presentador e actor Paco Lodeiro será o encargado de realizar o pregón dunha das xornadas máis participativas, orixinais e emblemáticas do Entroido de Verín: o Xoves de Comadres. Con grandes doses de humor, ironía e risas, este showman aportará unha visión particular aos asuntos de actualidade nunha noite na que se iniciará de modo oficial o ciclo do Entroido na localidade.

O domingo 03 de febreiro, descarga de bombas de palenque e concentración de cigarróns na praza do Concello a partir das 11:30 horas. Con posterioridade, saúdo aos fregueses á saída das igrexas Parroquial e RR.PP. Mercedarios.

Coincidindo coa elaboración do Plan de Autoprotección para o Entroido, por parte da área de Seguridade Cidadá do Concello de Verín, realizouse un tríptico do Entroido de Verín que inclúe, ademais dun pequeno programa e información sobre a figura do cigarrón, normas de seguridade a aplicar durante a celebración do Xoves de Comadres e nos desfiles.

O Concello de Verín acolleu unha reunión da Xunta Local de Seguridade, co-presidida polo subdelegado do Goberno en Ourense, Roberto Castro García, e o alcalde de Verín, Juan Manuel Jiménez Morán, e na que participaron membros dos Corpos e Forzas de Seguridade do Estado.

O departamento de Servizos Sociais Comunitarios Básicos do Concello de Verín porá en marcha, a partir de febreiro, o programa 'Estamos a Tempo', destinado tanto a persoas maiores como aos/ás coidadores/as informais dos/as dependentes.