A guía Rutas da auga editada polo Eixo Atlántico recolle, por primeira vez, a divulgación conxunta do patrimonio termal dos municipios de Chaves e Verín.
Ambas localidades, que suman 690 quilómetros cadrados, contan con seis balnearios -Cabreiroá, Sousas, Fontenova, Caldeliñas, Vidago e Termas de Chaves- entre eles o que posúe as augas máis quentes de toda a Península Ibérica, e catro plantas de embotellado de auga mineral de gran calidade, tres en Verín -Sousas, Fontenova e Cabreiróa- e unha en Chaves -Vidago-.

O ciclo Cinemas Dixitais retorna a Verín co fin de achegar ao público galego unhas obras audiovisuais que non acceden ás plataformas tradicionais de distribución e exhibición: os filmes árabes, que son unha escolma do mais representativo do último cinema xurdido baixo as peculiaridades da cultura árabe.

Esta actividade organizada polo Festival de Cinema Euro-Árabe de Santiago de Compostela e a Axencia Audiovisual Galega, en colaboración co Concello de Verín, ten como fin coñecer outras realidades e a consciencia “do outro”, para comprender mellor a súas singularidades e integrar e respectar mellor as comunidades emigrantes que decidan convivir connosco.

Nesta ocasión, de forma gratuíta, os habitantes de Verín poderán visionar estes filmes desde o 23 ao 26 de xuño, ás 20.15 horas, na Casa da Cultura de Verín.

23 de xuño: Sombras na noite
24 de xuño: Cinturón de lume
25 de xuño: En coche ata Zigzigland
26 de xuño: Máis alá do muro